Одделот за ефикасност на владата на милијардерот Илон Маск ги предводеше напорите за распуштање на Американската агенција за меѓународен развој, главниот механизам за испорака на американска помош за странство и клучна американска алатка за „мека моќ“ за стекнување влијание во странство.
„Со жалење ве информирам дека сте засегнати од акцијата за намалување на работната сила“, се вели во е-поштата испратена до еден од вработените кој е отпуштен, а на увид ја имал Ројтерс. Оние кои ја примиле пораката ќе бидат отпуштени од федералната служба од 24 април, се вели во е-поштата.
УСАИД на својата веб-страница нешто пред полноќ во неделата, по американско источно време, објави дека сите директно вработени освен основните ќе бидат на одмор и дека 1.600 вработени на УСАИД во САД ќе бидат отпуштени.
Во претходното известување испратено до персоналот, во кое увид имал Ројтерс, се вели дека околу 2.000 работни места во САД ќе бидат укинати. Белата куќа не одговори веднаш на барањето за коментар.
Во петокот, федерален судија ѝ го отвори патот на администрацијата на Трамп да стави илјадници вработени во УСАИД на административно отсуство, што е чекор назад за синдикатите на државните службеници кои тужат поради, како што ги нарекоа, напорите за нивно распуштање.
Двајца поранешни високи функционери на УСАИД процениле дека повеќето од околу 4.600 вработени во УСАИД, кариерни службеници во американската државна служба и во странски служби, ќе бидат ставени во административно отсуство.
„Оваа администрација и (државниот секретар Марко) Рубио се кусогледи во кратењата со кои се опфатени експерти и уникатен капацитет на САД за одговор на кризи. Кога ќе се појават болести, кога ќе започне раселување на населението, овие експерти на УСАИД се на терен и се првите што се распоредуваат за да помогнат во стабилизирањето и обезбедувањето помош“, рече Марсија Вонг, поранешно официјално лице.
Трамп нареди 90-дневна пауза на странската помош веднаш по преземањето на функцијата на 20 јануари, запирајќи го финансирањето на сè, од програмите за борба против глад и смртоносни болести до обезбедувањето засолниште за милиони раселени лица ширум светот.
Администрацијата одобри исклучоци од замрзнувањето во вкупна вредност од 5,3 милијарди долари, главно за безбедносни програми и програми за борба против наркотици, според списокот на исклучоци прегледани од Ројтерс, кој вклучува ограничена хуманитарна помош.
Програмите на УСАИД добија помалку од 100 милиони долари за исклучоци, во споредба околу 40 милијарди долари во програмите што ги спроведуваше годишно пред замрзнувањето.
