Трамп се огласи неколку часа откако Зеленски возврати на неговата сугестија дека Украина е одговорна за целосната инвазија на Русија во 2022 година, велејќи дека американскиот претседател е заробен во руска дезинформативна мрежа, пренесува Ројтерс.
„Диктатор без избори, Зеленски треба брзо да дејствува или нема да има земја“, напиша Трамп на својата социјална мрежа Трут соушл.
„Во меѓувреме, ние успешно преговараме за крај на војната со Русија, нешто што сите признаваат дека само „ТРАМП“ и администрацијата на Трамп можат да го направат. Бајден никогаш не се обиде, Европа не успеа да донесе мир, а Зеленски веројатно сака да ги задржи „парите без напор“. Ја сакам Украина, но Зеленски направи ужасна работа, неговата земја е уништена, а МИЛИОНИ непотребно загинаа“, додаде Трамп.
Како одговор, украинскиот министер за надворешни работи Андриј Сибиха рече дека никој не може да ја натера неговата земја да попушти. „Ќе го браниме нашето право да постоиме“, напиша Сибиха на мрежата Икс.
Петгодишниот мандат на Зеленски требаше да заврши во 2024 година, но претседателските и парламентарните избори не можат да се одржат во воена состојба, која Украина ја воведе во февруари 2022 година како одговор на руската инвазија.
Зеленски, кој во средата во Киев се сретна со претставникот на Трамп за Украина, Кит Келог, рече дека би сакал тимот на Трамп да има „повеќе вистина“ за Украина, еден ден откако Трамп рече дека Украина „никогаш не требало да ја започне“ војната со Русија.
Украинскиот лидер рече дека тврдењето на Трамп дека рејтингот му е само 4% е руска дезинформација и дека секој обид за негова замена ќе пропадне.
„Имаме докази дека за овие бројки се разговара меѓу Америка и Русија. Односно, претседателот Трамп за жал живее во овој простор на дезинформации“, изјави Зеленски за украинска телевизија.
Последната анкета на Меѓународниот институт за социологија во Киев, од почетокот на февруари, вели дека 57 отсто од Украинците му веруваат на Зеленски.
На помалку од еден месец од почетокот на неговото претседателствување, Трамп ја смени американската политика кон Украина и Русија, ставајќи крај на напорите на Вашингтон да ја изолира Русија поради нејзината инвазија на Украина преку телефонски разговор со Путин и разговори меѓу високи американски и руски претставници.
