„Политичкиот прогон на санкционираниот кршител на човекови права, Александар де Мораес, продолжува додека тој и другите членови на Врховниот суд на Бразил неправедно донесуваат одлука да го затворат поранешниот претседател Болсонаро. Соединетите Американски Држави ќе одговорат соодветно на овој лов на вештерки“, напиша Рубио на платформата Икс.
Петчлениот совет на Врховниот суд на Бразил формираше мнозинство за да го осуди поранешниот претседател на земјата Жаир Болсонаро за наводен заговор за спроведување државен удар, објави Ројтерс.
Судијката Кармен Лусија гласаше за осуда на Болсонаро, придружувајќи им се на судиите Александар де Мораес и Флавио Дино. Судијата Луиз Фукс, единствениот што не се согласи со пресудата на Болсонаро, вчера гласаше за ослободување на поранешниот претседател и поништување на неговото судење.
Кармен Лусија сè уште не гласала за другите обвиненија против Болсонаро, вклучувајќи обид за државен удар и обид за насилно соборување на демократската власт.
Болсонаро е обвинет за учество во вооружена криминална организација, обид за насилно соборување на демократијата, организирање државен удар и оштетување на владин имот и заштитени културни добра.
Адвокатите на Болсонаро изјавија дека тој е невин по сите обвиненија и тврдат дека за време на неговото судење биле направени неколку процедурални грешки.
