Германецот Шток, кој беше генерален секретар на Интерпол од 2014 до 2024 година, изјави за порталот тејбл.медиа дека војните, конфликтите и едностраните потези на државите ја загрозуваат глобалната безбедност и надвор од воените опасности.
„Ниту една држава не може сама да се спротивстави на оваа закана“, нагласи поранешниот шеф на Интерпол.
Во исто време, зголемувањето на бројот на авторитарни режими во светот и помалата соработка меѓу државите ја влошуваат ситуацијата. Нестабилноста што оди заедно со нападот на Русија врз Украина и војната во Газа им помага на криминалните структури да се прошират, рече Шток, наведувајќи ги како примери трговијата со оружје, еколошкиот криминал, трговијата со луѓе и шверцот на луѓе.
„Најопасните групи на организиран криминал сè повеќе се диверзифицираат, во безбедносните кругови ова се нарекува поли-криминал, а своите цели ги постигнуваат преку брутална сила и инфилтрација во приватниот сектор и државната администрација“, рече Шток.
Според него, посебна опасност е криминалот што се потпира на технологија и напаѓа критична инфраструктура, па затоа светот како никогаш досега живее во постојана состојба на сајбер криминал. Шток додаде дека е загрижен и што во контекст на технолошката конкуренција, на пазарот се лансираат производи од вештачка интелигенција, чии последици за меѓународниот криминал сè уште не можат да се проценат.
„Ние (Интерпол) мора да се држиме подалеку од контроверзни политички теми. Уметноста на соработка со 196 членки на Интерпол се состои во обезбедување постоење на правила, засновани на Декларацијата за човекови права и стандардите за заштита на податоците“, рече Шток.
Интерпол инсистира на почитување на овие правила, а за да се убедат членките дека им е потребен силен Интерпол, според него, неопходна е многу дипломатија зад затворени врати, многу доверба и размена на чувствителни податоци.
Додаде дека структурите на организиран криминал многу добро ги препознаваат слабостите во меѓународната полициска соработка и знаат како да ги искористат.
Тој оцени дека и самиот Интерпол е делумно одговорен за недовербата што постои кон него, поради неговиот контроверзен метод на финансирање.
Шток рече дека, откако светската полициска организација беше финансирана исклучиво од членарините на земјите-членки во 2011 година, неговиот претходник создаде нов модел, според кој повеќе од една четвртина од буџетот беше пополнета од фармацевтски концерни, ФИФА или компании како Филип Морис, кои исто така поставија одредени ограничувања за независноста на истрагите на Интерпол.
Откако беше избран, Шток, според неговите зборови, донекаде го смени овој модел, го намали уделот на приватното финансирање и ги зголеми членарините, кои сега повторно го сочинуваат најголемиот дел од буџетот. Сепак, одредени сомнежи за независноста на Интерпол постојат до ден-денес, рече Шток.
