Асошиејтед прес: Полицијата нападна мирни демонстранти
Полицијата за разбивање на демонстрации, вооружена со палки, употреби солзавец и нападна илјадници мирни демонстранти кои бараа слободни избори и правда во град во северна Србија во петокот, по неколкумесечни протести против автократското владеење на претседателот Александар Вучиќ, пренесе денес Асошиејтед прес, чиј извештај го објавија многу американски медиуми како што се Вашингтон пост и Еј-Би-Си њуз.
Вучиќ, кој тврди дека сака да ја внесе Србија во Европската унија, демонстрантите ги означи како терористи кои сакаат да го соборат со помош на Западот. На почетокот на оваа недела тој присуствуваше на состанок во Кина, на кој присуствуваа рускиот претседател Владимир Путин, лидерите на Кина и Северна Кореја, како и претседателите на Белорусија и Иран, се наведува во текстот.
Универзитетските студенти се клучна сила зад протестите ширум земјата, кои бараат слободни медиуми, предвремени избори и кривично гонење на одговорните за уривањето на настрешницата.
Десетици универзитетски професори, декани и наставници во средни училишта беа сменети во последните месеци, бидејќи властите преземаат мерки против поддржувачите на студентите. На нивни места се поставени лојални лица на Вучиќ, се додава во него.
Протестот во петокот беше фокусиран околу универзитетската зграда која пред повеќе од една недела беше окупирана од лојалистите на Вучиќ и полицијата.
Демонстрантите во Нови Сад извикуваа „Сакаме избори“ и „Вучиќ оди си“, ветувајќи дека ќе ја бранат автономијата на универзитетите.
Полицајците за разбивање демонстрации првично обезбедуваше одредени универзитетски објекти, но подоцна пристигна засилување со специјални возила, по што се упатија кон демонстрантите. Градските улици беа покриени со солзавец и чад од шок-бомби и ракети додека полицијата ги растеруваше демонстрантите од кампусот.
Брзата полициска интервенција го одразува сè поостриот одговор на Вучиќ на протестите. Според Еј-би-си, тој одби да распише предвремени парламентарни избори што ги бараа демонстрантите.
Вучиќ, се додава, не понуди докази за тврдењата дека протестите се поттикнати од странство. Стотици студенти и други граѓани беа уапсени и претепани за време на протестите, што предизвика меѓународни критики кон владата на Вучиќ.
Ројтерс: Полицијата фрли шок бомби
Агенцијата Ројтерс, чии извештаи ги пренесуваат и Си-Ен-Ен и бројни европски медиуми, нагласува дека полицијата фрлила солзавец и шок-бомби за да ја растера толпата во универзитетскиот кампус. Се наведува дека илјадници луѓе извикувале слогани како „Вучиќ оди си“ и „Сакаме избори“, додека демонстрантите носеле транспаренти против блокадите и за слободни избори.
Ројтерс потсетува дека протестите што траеја со месеци започнаа по смртта на 16 лица во уривањето на железничката станица, што се припишува на корупцијата и небрежноста на владата. Медиумот нагласува дека студентите и опозицијата се обединети во нивните барања за предвремени избори, со тврдења дека владата ги задушува медиумските слободи и користи насилство против противниците.
ОРФ (Австрија): Најголемото протестно движење од распадот на Југославија
Жандармеријата и полициските сили насилно растераа илјадници собрани граѓани од Универзитетот во Нови Сад, австрискиот сервис ОРФ го пренесува текстот на Н1.
Според извештаите, полицијата употребила солзавец, палки и шок бомби. Според извештаите на медиумите, интервенцијата започнала откако непознати лица фрлале предмети кон полицајците пред зградата на Филозофскиот факултет.
Овој факултет недела и половина е во центарот на демонстрациите, откако деканот, за кој се знае дека е близок до власта, со полициска заштита ги принуди студентите да ја напуштат зградата што ја блокираа девет месеци.
Речиси секојдневни демонстрации и блокади во сообраќајот
Причина за протестите беше уривањето на реконструираниот покрив на железничката станица во Нови Сад на 1 ноември 2024 година, кога животот го загубија 16 лица. Независните експерти и опозицијата ја обвинуваат за трагедијата небрежноста и корупцијата во владата на Вучиќ.
Оттогаш, во Србија речиси секојдневно се одржуваат демонстрации и сообраќајни блокади, најчесто иницирани од студенти. Студентите оттогаш ги окупираа речиси сите универзитети во земјата. Најголемото и најдолготрајното протестно движење во Србија од распадот на Југославија сега погодува широки слоеви на општеството. Со барањето за предвремени избори, студентите и граѓаните го ставаат Вучиќ и неговата влада под сериозен притисок.
