„Кога зборуваме за елиминирање на основните причини за секој конфликт, вклучувајќи го и украинскиот, тоа е единствениот начин за решавање на проблемот и воспоставување траен мир. Решете ги основните причини“, рече Лавров на Дипломатскиот форум во Анталија, јужна Турција.
„Претседателот Трамп беше првиот и досега мислам единствениот меѓу западните лидери, кој постојано, со убедување, неколку пати рече дека е огромна грешка да се приближи Украина до НАТО. И тоа е една од основните причини, како што многупати кажавме“, рече Лавров.
Рускиот претседател Владимир Путин, кој ја започна инвазијата на Украина во февруари 2022 година, долго време говори дека приближувањето на Украина со Западот, вклучително и нејзината желба да се приклучи на НАТО, е закана за Русија.
Коментирајќи го договорот меѓу Украина и Русија за паузирање на меѓусебните напади врз енергетската инфраструктура, Лавров рече дека Москва го почитува своето ветување и го обвини Киев дека речиси секој ден ја напаѓа руската енергетска инфраструктура.
„Им дадов на нашите турски колеги, министерот Фидан, она што им го дадовме на Американците, ОН, ОБСЕ – список со факти во кои се детализирани украинските напади врз руската енергетска инфраструктура во изминатите три недели“, рече тој.
Украина, исто така, ја обвинува Русија дека продолжува да ја напаѓа нејзината енергетска инфраструктура и покрај мораториумот договорен со посредство на САД.
