Како што соопшти МВР, посакувајќи му што поскоро опоравување на повредениот началник, министерот Спасовски го повтори својот став дека напад на припадник на македонската полиција е напад на државата, поради што мора да има најстроги санкции за тој кој ќе се осмели да изврши таков чин на насилство.
„Насилството е последното прибежиште на криминалците, последниот обид да ги заплашат оние кои се задолжени за спроведување на законот. Затоа казната од правосудните органи треба да е брза, навремена, строга и без отстапки. А последниот удар на полицијата до конечна пресметка со криминалот – најсилен“, порача Спасовски по посетата.
Како што наведуваат од МВР, обидот за убиство се случи на 28 јули околу 17:35 часот на улицата Ристо Крле во Струга кога осомничениот Сефер Насуфи со своето возило му го попречил патот на Дритан Ајро кој бил во неговото возило и прво вербално го нападнал, а потоа му нанел повреди со остар предмет, по што се дал во бегство. Ајро бил пренесен во болницата во Струга, каде му е укажана лекарска помош.
Од страна на полициски службеници од СВР Охрид-НККР Струга, Оддел за криминалистичка полиција-Сектор за општ и насилен криминал и Оддел за специјални полициски операции преземени се мерки и активности, по што Насуфи беше лишен од слобода поради основи на сомнение за сторено кривично дело убиство во обид.
На Насуфи му е одредена мерка притвор во траење од 30 дена, по што е спроведен во затворот Скопје во Шутка.
МКД.мк претходно објави дека осомничениот Сефер Насуфи е брат на поранешниот директор на Бирото за јавни набавки и актуелен член на Бордот на директори на Т-хоум.
Како што објави вчера МКД.мк, началникот на струшката полиција Дритан Ајро кој вчера беше прободен со нож е брат на поранешниот обвинител на специјалното јавно обинителство (СЈО), Артан Ајро кој по распадот на СЈО беше избран како обвинител во Обвинителството за гонење на организиран криминал и корупција (ОЈО ГОКК), а неодамна беше унапреден во обвинител во Вишото јавно обвинителство Скопје.
Ајро вчера беше опериран и според информациите на дежурнииот хирург се наоѓа надвор од животна опасност.