Продолжуваат подготвителните градежни работи на коридорот 10д на автопатската делница Прилеп – Битола како дел од активностите за изградба на овој коридор чиј почеток на реализација беше означен вчера во Прилеп и кој на државата ќе ѝ обезбеди модерна автопатска делница која ќе го забрза патувањето кон соседните држави. Оваа автопатска делница со вкупна должина од 39,3 километри е приоритетна за граѓаните од Прилеп, Крушево, Битола, Могила, Новаци, Ресен, како и за сите останати кои живеат или транзитираат низ овој регион, наведува Владата.
Со проектот е предвидена изградба на модерни автопатски делници на четири патни правци во должина од 110 километри, како дел од Коридорите 8 и 10д: автопатот Тетово – Гостивар, Гостивар – Букојчани, Требениште – Струга – Ќафасан и автопатот Прилеп – Битола. Автопатските делници е предвидено да бидат изградени во следните четири години и седум месеци, а изведувач на проектот е американско-турскиот конзорциум „Бехтел и Енка“.
„Коридорот 10д и Коридорот 8 се најголемиот инфраструктурен проект во историјата на нашата држава. Модернизацијата на двата Коридори 8 и 10д за Северна Македонија се можност за целосно интегрирање со регионот и со европската мрежа на коридори во Европа, преку кои создаваме можности за економска конкурентност и напредок на државата. Овој проект е најзначаен во историјата на нашата држава и од причина што Коридорoт 8, станува дел од мрежата на главните трансевропски коридори за што веќе следната недела Владата и Европската Унија ќе потпишат анекс на договорот со кој Коридор 8 се вклучува во главните коридори во Западен Балкан како дел од трансевропските мрежи на ЕУ“, наведува Владата.
Со реализација на овој проект се заокружуваме патната оска Исток – Запад, со што земјава се поврзува со две пристаништа: едното во Бургас, Бугарија и другото во Драч, Албанија.
„Дополнително, преку пристаништето во Драч ја имаме можноста за поврзување со пристаништето Бриндизи во Италија. Во иста мерка значаен е и Коридорот 10д кој нѐ поврзува на југозапад со Република Грција преку граничниот премин Меџитлија бидејќи со реализација на новата автопатска делница се забрзува патувањето во овој патен правец и се овозможува уште една врска со солунското пристаниште како услов за развој на пелагонискиот регион. Со изведбата на овој проект се обезбедуваат нови 8.000 работни места, нови инвестиции од 1,3 милијарди евра и номинален раст на БДП од 2 отсто годишно во наредните пет години. Реализацијата на проектот и ангажманот на домашни компании во неговата изградба, ќе отвори голем број можности за нови бизниси и ќе се создадат услови за рамномерен регионален развој, а државата ќе се позиционира на светската економска и инфраструктурна карта“, истакнува Владата.
Јас навистина сакам некој да им објасни на граѓаните од Битола и Прилеп дека во овој момент може да се стопира градбата на автопатот што го чекаат 50 – 60 години. Треба да се работи во насока на остварување на сите овие проекти за градење на коридорите 8 и 10д и во таа смисла да се почитуваат сите правила и законски норми што важат, изјави министерот за внатрешни работи, Оливер Спасовски.
„Ова е еден од најголемите проекти чија реализација е исклучително важна. Градбата на инфраструктурата во една држава значи основа за економски развој“, подвлече Спасовски по дефилето „Јас внимавам и безбедно возам“.
