Тој за време на посетата на Институтот за нуклеарно оружје и производната база за нуклеарни материјали за оружје повика да се вложат поинтензивни напори во, како што е наведено, „експоненцијалното зголемување“ на количеството нуклеарно оружје.
Од фотографиите не е јасно дали станува збор за главниот севернокорејски нуклеарен комплекс Јонгбјон на северот на земјата, но ова е првпат Пјонгјанг да извести за објекти за збогатување ураниум откако во 2010 година им го покажаа Јонгбјон на гостувачки американски научници.
Иако ова е веројатно обид да се изврши притисок врз Соединетите Американски Држави и нивните сојузници, фотографиите можат за заинтересираните да бидат вреден извор на информации за проценка на количеството нуклеарни состојки кои Северна Кореја ги произвела.
Корејската централна новинска агенција (КЦНА) извести дека Ким ја посетил контролната соба за збогатување ураниум и градилиште, бидејќи се планира да се прошират капацитетите за производство на нуклеарно оружје.
Ким кажа дека на Северна Кореја ѝ се потребни поголеми капацитети за одбрана и превентивен напад бидејќи „нуклеарните закани против Северна Кореја од силите предводени од американските империјалисти станаа поотворени и ја поминаа црвената линија“, наведува КЦНА.
Министерството за обединување на Јужна Кореја соопшти дека остро го осудува севернокорејското покажување на објектите за збогатување ураниум и најавите на Ким за зголемување на нуклеарните капацитети на својата земја.
