„Во текот на вчерашниот ден, екипите на ЈП Комунална хигиена-Скопје, во втората и во третата смена, реализираа засилени активности за собирање и транспорт на комуналниот отпад во сите скопски општини. Континуирано се расчистуваа и повеќе обемни диви депонии лоцирани на улиците Џон Кенеди, Благоја Паровиќ и Методија Митевски во општината Чаир, како и на улицата Прашка во општината Карпош.
Воедно, беа спроведени активности за одржување на хигиената на јавните и на сообраќајните површини со коишто беа опфатени и централното градско подрачје, кејот 13 Ноември и Старата скопска чаршија“, се вели во соопштението од претпријатието.
Викендов Скопје беше затрупано со ѓубре поради протестот организиран од трета смена на претпријатието, откако директорката Косана Мазнева Николиќ презеде остри мерки против дел од нив сметајќи ги за „мафија“ и неработници кои не ни доаѓаат на работните места или живеат во странство, а примаат плата.
Според информациите од вработените, 27 работници добија отказ.