„Европа повеќе не може да зависи само од Соединетите Американски Држави во одбраната на своите вредности и заедничките интереси“, се наведува во реткото заедничко соопштение на лидерите на десницата, левицата, еколозите и центарот.
Соочени со американско-руската дипломатска офанзива да се заврши војната во Украина, „Европската Унија и нејзините држави членки немаат друг избор освен да дејствуваат веднаш“, се истакнува во соопштението.
Најавата за почнување преговори на Вашингтон и Москва за прекин на непријателствата во Украина тешко погоди голем број европски лидери, уплашени дека нема да бидат вклучени во процесот.
Според лидерите на четирите групи европратеници, неопходно е „да се соочат со новата реалност и да ги удвојат напорите за одбрана на Украина и европската безбедност“.
„Нашите групи се свесни за итноста и потребата брзо да се реагира за да се обезбедат неопходните средства за нашата одбранбена политика“, се истакнува во соопштението.
