недела, 14 јули 2024

Полиција ќе го чува мирот во Центар од хулигани, мангупи и бучни клубови

Општина Центар ќе добие полициска помош и асистенција во справување со вандализмот, сообраќајниот хаос и прегласната музика во Капиштец, но и во другите населби во локалната самоуправа. Ова беше договорено со началникот на СВР Скопје Сашо Топаловски на работниот состанок што се одржа на иницијатива на градоначалникот Горан Герасимовски, соопшти Општината.

Објавено на

часот

Сподели

Од Општина Центар велат дека претставниците на МВР биле информирани за последните инциденти во населбата Капиштец, дивеењето на хулиганите и уништувањето на детските игралишта, демолирањето на уличното осветлување и ограбување на комуналниот пункт во вечерните часови. Како што се нагласува, Општина Центар и официјално поднесе пријава до МВР, со пропратен материјал што би можел да помогне во истрагата. Договорено е полицијата да го зголеми присуството и патролите на терен.

Градоналникот Герасимовски на средбата го покренал и прашањето за локалите долж улицата Народен фронт, за прекумерната бучава и сообраќајниот метеж, за што беше поднесена и граѓанска петиција.

„Жителите на Капиштец побараа од нас да ги повикаме сите надлежни институции и министерства за да се стави крај на самоволието  на угостителските објекти. Во таа насока со МВР договоривме да преземеме конкретни чекори за да им го вратиме мирот и на нив и на другите жители во општината кои имаат слични проблеми“, рече Герасимовски.

Во делот на сообраќајот и непрописното паркирање, договорено е Министерството за внатрешни работи да ги засили контролите на најфреквентните места и да биде обезбедена полициска асистенција за пајак службата на Општина Центар која ќе почне да делува и во трета смена, посебно во деновите пред и за време на викендите. Инспекторите на Општина Центар заедно со полицијата ќе делуваат засилено и во делот на регулирање на прекумерната бучава.

ТОП ВЕСТИ

ПОСЛЕДНИ ВЕСТИ