Гласачите го одобрија уставниот амандман со кој се гарантира правото на абортус во Охајо, држава која гласаше за републиканецот Доналд Трамп со 8 процентни поени на претседателските избори во 2020 година, покажуваат проекциите на Едисон рисрч.
Исходот ја продолжи низата без пораз на застапниците за правата на абортус по минатогодишната одлука на американскиот Врховен суд да ја поништи пресудата Роу против Вејд од 1972 година и да го укине националното право за прекин на бременоста.
Во Вирџинија, демократите ја освоија контролата врз двата законодавни домови, наведе Асошиејтед прес. Резултатот е удар за републиканскиот гувернер Глен Јангкин, кој водеше силна кампања за републиканските кандидати и се обиде да ги обедини околу својот предлог да се забранат повеќето абортуси по 15 недела од бременоста.
Во Кентаки, демократскиот гувернер Енди Бешеар го освои вториот четиригодишен мандат, според проекциите на Едисон, пркосејќи ѝ на конзервативната склоност на државата која гласаше за Трамп со повеќе од 25 процентни поени во 2020 година.
Изборите дадоа показател за тоа како размислуваат гласачите на помалку од 10 недели пред сериозно да започне претседателската кампања 2024 во Ајова со трката за претседателска номинација.
Американскиот претседател Џо Бајден го пофали резултатот во Охајо, велејќи: „Вечерва Американците уште еднаш гласаа за заштита на своите основни слободи – и победи демократијата“.
Бешеар го победи јавниот обвинител на Кентаки, Даниел Камерон, кој би бил првиот црнец на местото гувернер.
И покрај својата партиска припадност, Бешеар задржа висок рејтинг, зајакнат со своето лидерство за време на пандемијата на коронавирус и природните катастрофи. Тој, исто така, се залагаше за заштита на правата на абортусот, иако не може да ја поништи речиси целосната забрана на државата.
Во својот победнички говор, Бешеар ја нарече својата победа „јасна изјава дека политиката на гнев треба да заврши токму овде и сега“.
Охајо беше последното бојно поле за абортус, речиси една и пол година по одлуката на Врховниот суд. Во изминатата година, групите за правата на абортусот постигнаа серија победи со ставање на референдум за абортус на гласачкото ливче, вклучително и оние во конзервативните држави.
Тие ја удвоија таа стратегија. Исходот во Охајо ќе ги поттикне напорите кои веќе се во тек да се стават слични изборни мерки пред гласачите во неколку држави за 2024 година, вклучително и Аризона и Флорида.
Силите против абортусот водеа кампања против амандманот од Охајо како прекстремен, додека групите за заштита на правата за абортус предупредуваат дека неговото отфрлање ќе отвори пат да стапи на сила строга забрана.
