„Имавме исклучително тежок јуни во однос на временските услови, со силна суша и невообичаено силен ветер за овој период од годината. Сакам да им се заблагодарам на сите за одличната работа во последните неколку дена, но и да го свртам вниманието на сите на летото за кое се предвидува да биде особено опасно“, рече Мицотакис, пренесува порталот Катимерини.
Шумските пожари се вообичаени во Грција, а топлото, суво и ветровито време кое научниците го поврзуваат со ефектите од климатските промени ја зголеми нивната зачестеност и интензитет. Само овој викенд, десетици пожари избувнаа низ Грција, вклучително и два во близина на главниот град Атина.
Мицотакис рече дека во двата пожари изгореле околу 100.000 квадратни метри земјиште и оти штетата била ограничена поради брзата реакција на државните служби за вонредни состојби. Оваа година, како дел од подготовките за гаснење пожари, Грција ангажираше повеќе припадници на противпожарната служба и ги интензивираше процесите на професионална обука.
„Сите заинтересирани ќе можат да ги поднесат своите кандидатури и да ги поминат задолжителните тестови и надвор од распоредот на редовните конкурси за прием на кандидати во противпожарната служба“, изјави грчкиот премиер.