По коментарите на претседателот Доналд Трамп во средата, 19 февруари, кога го нарече Володимир Зеленски „диктатор“, Украинците се плашат дека воената помош на САД наскоро ќе биде во ризик под новата администрација.
Во оваа фаза, испраќањето дополнителна одбранбена опрема не е официјално доведено во прашање. Но без американска воена помош „ќе издржиме шест месеци“, вели генерал-полковникот Ихор Романенко, поранешен прв заменик на Генералштабот на украинските вооружени сили, за Ал џезира на 17 февруари, за време на конференцијата во Минхен. „Европа нема шанси да ја замени американската помош“, додаде тој. Николај Митрохин, истражувач на Универзитетот во Бремен (Германија), исто така цитиран од катарскиот канал, додаде дека сегашните резерви на САД, доколку се користат умерено, не можат да траат подалеку од „средината на летото“ или „есента“.
Освен неверојатните суми – речиси 70 милијарди долари потрошени од почетокот на војната во 2022 година, без директните буџетски субвенции – американската воена помош за Киев е од витално значење за неколку клучни сегменти од украинските одбранбени операции. Тие вклучуваат противвоздушна и ракетна одбрана, која во суштина е составена од системи патриот позиционирани околу чувствителните инфраструктури и главниот град Киев. Сепак, на овие системи им требаат многу скапи пресретнувачки ракети, кои исто така доаѓаат од САД.
Споделување разузнавачки информации и телекомуникациска безбедност
Украинците, исто така, во голема мера зависат од САД за нападите длабоко на руска територија, типот на напади што најмногу ја дестабилизираа Москва во последните месеци, до точка на поткопување на нејзината способност за одвраќање, вели Ле монд. Иако Киев има развиено сопствени беспилотни летала со долг дострел за поголема автономија, во некои од овие напади се користат американски ракети АТАКМС. САД се исто така главен снабдувач на артилериска муниција од 155 милиметри. Сепак, нема гаранција дека германскиот гигант Рајнметал, другиот голем производител на оваа муниција за Украина, ќе може да го надомести секое повлекување на Вашингтон.
Американскиот нагол пресврт може да влијае и на преносот на авионите Ф-16, кој штотуку започна, како и на поддршката во однос на размената на разузнавачки информации и украинската телекомуникациска безбедност. Во оваа фаза не е дадена јавна изјава за овие деликатни теми. Но замрзнувањето на средствата на УСАИД, на пример, директно се однесува на сателитските терминали Старлинк, кои се од суштинско значење. Овие терминали беа финансирани од американската агенција и никој не знае дали Спејсекс, во сопственост на Илон Маск, новиот советник на претседателот Трамп, продолжил да ја одржува мрежата за да управува со веќе испратените уреди.
Освен големите дипломатски зделки на Трамп и новово приближување на Вашингтон со Москва, голем дел од американската воена помош за Украинците ќе се одрази на дебатите за буџетот на САД за фискалната 2026 година. Тие тукушто почнуваат, во време кога плафонот на американскиот долг е предмет на жестока дебата преку Атлантикот.
