САД го зголемија своето присуство во азиско-пацифичкиот регион за да го ограничат влијанието на Кина, која неодамна одржа серија воени вежби во близина на Тајван. Но, двете ривалски сили сепак ги испратија своите воени бродови на меѓународната поморска вежба „Комодо“, која Индонезија ја одржува од понеделник до четврток на истокот од својата територија, во близина на островот Сулавеси.
Американската морнарица таму има лесна фрегата, изјави во неделата за АФП портпаролот на американската амбасада во Џакарта. Вежбата ќе им овозможи на САД „да им се придружат на земјите, сојузниците и партнерите кои имаат ист пристап во решавањето на заедничките проблеми“, како што се хуманитарните мисии и одговорот на природните катастрофи, додаде тој.
Кинеското Министерство за одбрана минатата недела, одговарајќи на поканата од индонезиската морнарица, соопшти дека ќе испрати разурнувач и фрегата. Свои бродови треба да испрати и Русија, што се гледа од списокот објавен од индонезиските власти, а Австралија ќе испрати фрегата и командантот на својата морнарица, вицеадмиралот Марк Хамонд.
Ќе учествуваат вкупно 17 странски бродови и дваесетина индонезиски бродови. „Меѓународната поморска вежба Комодо не е подготовка за војна, туку ѝ дава приоритет на поморската соработка во регионот“, рече портпаролот на индонезиската морнарица Ајмеј Вирахади.
Во последните десет дена имаше два инцидента во кои беа вклучени американски и кинески сили во Тајванскиот теснец и во Источното Кинеско Море. Американскиот секретар за одбрана Лојд Остин во саботата на состанокот на самитот во Сингапур рече дека е „важно“ да се обнови дијалогот со Кина за да се спречат „недоразбирања“ кои би можеле да предизвикаат конфликт меѓу двете воени сили.
