Њујорк
10 ноември 1958 година
Драг Том,
Го добивме твоето писмо утрово. Јас ќе ти одговорам од моја гледна точка, а секако, Елејн ќе ти одговори од свое име.
Прво, ако си заљубен, тоа е добра работа, тоа е најдоброто нешто што може да му се случи на некого. Не дозволувај некој да ти го намали или обезвредни тоа чувство.
Второ, постојат неколку видови љубов. Една од нив е себичното, злонамерно, грабливо, егоистично чувство што ја користи љубовта заради самобендисаност. Овој вид љубов е грда и парализирачка. Друг вид е излевањето на сѐ што е добро во тебе – љубезноста и обѕирноста и почитта – не само општествената почит на манирите, туку поголемата почит, односот кон другата личност како кон уникатна и вредна. Од првиот вид може да се чувствуваш лошо и безначајно и ранливо, но вториот може да ги избликне силата, храброста и добрината во тебе, па дури и мудроста што не си знаел дека ја имаш.
Велиш дека ова не е површна заљубеност. Ако чувствата ти се толку длабоки – се разбира дека не е површна заљубеност.
Но мислам дека ти не ме ни прашуваш што чувствуваш. Ти тоа најдобро го знаеш. Она за што сакаш јас да ти помогнам е што да правиш во врска со тоа – а тоа можам да ти го кажам.
Како прво, уживај во тоа, и биди многу среќен и благодарен за тоа.
Предметот на љубовта е најдоброто и најубавото нешто. Обиди се да го заслужиш.
Ако сакаш некого – нема штета да се каже ова – само мора да запомниш дека некои луѓе се многу срамежливи и понекогаш исказите мора да ја земат предвид таа срамежливост.
Девојките знаат да го насетат или да го почувствуваат тоа што го чувствуваш ти, но обично сакаат и да го слушнат.
Понекогаш се случува твоето чувство да не ти е возвратено од разни причини – но тоа не го прави твоето чувство помалку вредно и добро.
И на крај, го знам твоето чувство затоа што го имам и јас, и мило ми е што го имаш ти.
Ќе ни биде драго да ја запознаеме Сузан. Таа ќе биде многу добредојдена. Но Елејн ќе подготви сѐ бидејќи тоа е нејзин терен и ќе ѝ биде многу драго. И таа знае многу за љубовта и можеби може да ти помогне повеќе од мене.
И немој да се грижиш дека ќе загубиш нешто. Ако треба, ќе се случи – главната работа е да не се брза. Ништо што е добро нема да ти избега.
Те сакам,
тато
