Вчера таква честитка испратија и претседателката на Македонија Гордана Сиљановска-Давкова и претседателот на Собранието Африм Гаши. Од Владата велат дека премиерот Христијан Мицкоски, преку Министерството за надворешни работи упати официјална честитка за Денот на независноста на Косово, согласно протоколарните правила и прописи, што е соодветен и официјален начин.
Освен тоа, официјалните информации кажуваат дека првиот заменик-претседател на Владата на Македонија, Изет Меџити, присуствуваше на државната церемонија по повод 17-годишнината од независноста на Република Косово, организирана од претседателката Вјоса Османи, претседателот на Собранието Глаук Коњуфца и премиерот Албин Курти.
И покрај ова, ДУИ на Али Ахмети денеска продолжи да манипулира со своето гласачко тело.
Овој чин не само што е дипломатски превид, вели ДУИ, туку е и директен сигнал кој го поткопува духот на добрососедство и регионална соработка. „Таквото однесување е резултат на растечкото влијание на концептот на ‘Српскиот свет’ во Северна Македонија — проект кој претставува закана за суверенитетот, европската перспектива и стратешките интереси на државата. Промовирањето на оваа идеологија на сметка на пријателските односи со Косово е недозволиво и штетно“, смета ДУИ.
Во вчерашното соопштение од Собранието на Македонија се вели дека Гаши, како претседател на Собранието го истакнува партнерството и одличните пријателски односи меѓу двете земји. Изградбата на успешна демократска држава и интеграцијата на Косово се мирољубиви битки што косовскиот граѓанин заслужува да ги добие, се вели во честитката на Гаши.
