„Станува збор за утврдени неправилности односно несовпаѓање во увозната декларација и фактичката состојба утврдена со контрола на товарното моторно возило со стока во количина од 1,2 тона меѓу којашто се и мобилни телефони и компјутерска галантерија, поради што и возилото беше пломбирано и задржано на детална контрола од страна на Царинската управа“, велат од Царинската управа.
Според првичното соопштение, на патниот правец Петровец – Скопје од страна на СВР Скопје е извршен претрес на патничко моторно возило, кое превезувало разна стока, увозно оцаринета на ЦИ Аеродром Скопје, поради сомневање дека во возилото се превезуваат наркотични средства.
Контролата била извршена со асистенција на инспектори од Секторот за контрола и истраги на Царинската управа и царинско куче. Притоа не се пронајдени наркотични средства, но констатирани се неправилности во однос на пријавената стока по увозната декларација и фактичката состојба на стоката во возилото.
„Со цел да се изврши детална контрола, возилото е пломбирано и привремено задржано заедно со стоката со вкупна тежина од 1,2 тони. За прегледот е побарана асистенција и од крим полиција, а за случајот е известено и надлежното основно јавно обвинителство. Откако ќе се изврши детална контрола и ќе се утврди фактичката состојба, ќе бидат покренати соодветни постапки“, информираа пред два дена од Царината.
