„Мислам дека ние Европејците имаме морална и политичка обврска да бидеме вклучени во оваа ситуација, не само со пружање помош, туку и со придонес кон изнаоѓање трајно решение“, рече Борел, пренесува лондонски Гардијан.
Посочувајќи на порастот на антисемитизмот и нагласувајќи дека „антисемитските и антимуслиманските чувства се целосно неприфатливи“, Борел рече дека ЕУ мора да преземе одговорност и да продолжи да одржува цврста и избалансирана позиција за по секоја цена да се избегне „увоз на овој конфликт во Европа“.
„Наша втора одговорност е хуманитарно решение. Мора да се почитува меѓународното хуманитарно право“, рече Борел и додаде дека „хуманитарна пауза во конфликтот и избалансиран пристап кон заложниците може да биде првиот чекор“.
Тој посочи дека е неопходно „масовно зголемување на хуманитарната поддршка“, евакуација на државјани од трети земји и „пропорционален одговор од Израел“.
„Меѓутоа, важно е да се размислува за сеопфатно и конечно решение, кое денес очигледно е недостижно“, нагласи Борел во денешниот говор во Брисел.
