Сликите и видеата објавени на социјалните мрежи покажаа дека помошниците и новинарите кои патувале со германскиот лидер морале брзо да излезат од авионот и да се засолнат лежејќи на пистата, додека Шолц, наводно, бил евакуиран во засолниште.
„Лично видов експлозии на небото кога израелската Железна купола (систем за противвоздушна одбрана) пресретна две ракети“, напиша на Твитер Робин Александар, заменик-главен уредник на германскиот весник Велт.
Kanzlermaschine in Tel Aviv vor Abflug geräumt, weil Alarm. Alle liegen auf Rollfeld für Deckung. Zwei Raketen erkennbar von Iron Dome getroffen über Flughafen. @welt pic.twitter.com/vZfqLGQQYY
— Robin Alexander (@robinalexander_) October 17, 2023
Шолц и оние што летаа со него можеле да се качат во авионот неколку минути подоцна, по дополнителни безбедносни проверки, пишува Билд.
Германскиот канцелар го посети Израел во вторникот за да ја изрази својата солидарност со земјата по бруталниот терористички напад на Хамас и да ги деескалира тензиите во регионот, како и да ја подобри хуманитарната помош за палестинските цивили во Газа.
#Raketenalarm in Tel Aviv. Die Regierungsmaschine wird umgehend evakuiert. @Bundeskanzler wird in einen Schutzraum gebracht. Wir legen uns vor dem Flugzeug auf den Boden. @robinalexander_ @frautoroxel pic.twitter.com/OTWV55KUoA
— Sara Sievert (@sara__si) October 17, 2023
Евакуацијата на неговиот авион се случи токму во моментот кога Шолц планираше да полета за Каиро, каде што денеска треба да се сретне со египетскиот претседател Абдел Фатах Ел Сиси.
Во вторникот вечерта, голема експлозија погоди болница во градот Газа, при што загинаа повеќе од 500 Палестинци, според палестинското Министерство за здравство, управувано од Хамас. Хамас и Израел меѓусебно се обвинуваат за нападот.
Претходно во вторникот вечерта, Шолц упати предупредување до Иран и Хезболах да не се мешаат во конфликтот меѓу Израел и Хамас. „Тоа би била тешка, непростлива грешка“, рече Шолц за време на прес-конференцијата со израелскиот премиер Бенјамин Нетанјаху во Тел Авив. Шолц нагласи и дека безбедноста на Израел е составен дел на германската државна политика и дека земјата има право да се брани од Хамас.
Но, Шолц, исто така, го предупреди Нетанјаху дека неговата војска мора да го почитува меѓународното хуманитарно право во одговорот на нападот на Хамас.
„Германија и Израел ги обединува фактот дека се демократски уставни држави. Нашите постапки се засноваат на законот и редот, дури и во екстремни ситуации“, изјави германскиот канцелар за новинарите. Тој рече дека разговарал со Нетанјаху „за начините да се достави хуманитарна помош за луѓето во Газа што е можно побрзо“.
Израелскиот премиер го потсети германскиот лидер на нацистичките масакри како оние во Бабин Јар во Украина во 1941 година. Неодамнешниот крвав напад на Хамас, рече Нетанјаху, беше „најлошото злосторство против Евреите од Холокаустот“.
Тој додаде: „Хамас се новите нацисти“.