Коосновачот на Викиликс Џулијан Асанж утрово е ослободен од затворот во Велика Британија, соопшти неговиот тим.
Тој помина пет години во затворот Белмарш во Лондон додека се бореше против екстрадиција во САД, каде што беше обвинет по 18 точки за ширење доверливи информации.
Според новоподнесените судски документи, 52-годишниот Асанж се согласил да се изјасни за виновен по едно кривично обвинение за заговор за добивање и откривање доверливи документи за националната одбрана на САД, според поднесоците во Окружниот суд на САД за Северните Маријански Острови.
Асанж деновиве треба да биде осуден на 62 месеци од веќе отслужената казна.
„Џулијан Асанж е слободен“, се вели во соопштението на Викиликс објавено на Икс.
„Тој го напушти максимално обезбедениот затвор Белмарш утрото на 24 јуни, откако помина таму 1.901 ден. Вишиот суд во Лондон му одобри кауција и беше ослободен на аеродромот Стенстед во текот на попладневните часови, каде што се качи на авион и замина од Обединетото Кралство“.
JULIAN ASSANGE IS FREE
Julian Assange is free. He left Belmarsh maximum security prison on the morning of 24 June, after having spent 1901 days there. He was granted bail by the High Court in London and was released at Stansted airport during the afternoon, where he boarded a…
— WikiLeaks (@wikileaks) June 24, 2024
Julian Assange boards flight at London Stansted Airport at 5PM (BST) Monday June 24th. This is for everyone who worked for his freedom: thank you.#FreedJulianAssange pic.twitter.com/Pqp5pBAhSQ
— WikiLeaks (@wikileaks) June 25, 2024
„Ова е резултат на глобалната кампања што ги опфати грас-рут организаторите, активистите за слобода на печатот, законодавците и лидерите од целиот политички спектар, сè до Обединетите нации. Ова создаде простор за долг период на преговори со американското Министерство за правда, што доведе до договор, кој сè уште не е формално финализиран. Ќе обезбедиме повеќе информации што е можно поскоро“, напиша Викиликс.
„По повеќе од пет години во ќелија од 2×3 метри, изолиран 23 часа на ден, тој наскоро повторно ќе се соедини со сопругата Стела Асанж и нивните деца, кои својот татко го познаваат само од зад решетки.
Викиликс објави револуционерни приказни за владина корупција и кршење на човековите права, барајќи одговорност од моќниците за нивните постапки. Како главен уредник, Џулијан брутално плати за овие принципи и за правото на народот да знае.
Додека се враќа во Австралија, им благодариме на сите што застанаа покрај нас, се бореа за нас и останаа целосно посветени во борбата за неговата слобода.
Слободата на Џулијан е наша слобода“, порача Викиликс.
