„По претходно обезбедени сознанија од страна на Агенцијата за национална безбедност во координација со Јавното обвинителство и Министерството за внатрешни работи – Биро за јавна безбедност, на 15.12.2024 година, беше спроведена акција на подрачјето на градовите Гостивар и Струга, во која беа опфатени и лишени од слобода четири лица, под сомнение дека биле инволвирани во активности поврзани до тероризам.
Заради превенција од извршување терористички активности, АНБ во соработка и преку размена на сознанија со партнерски служби во изминатиов период кон овие лица презеде засилени оперативни мерки и активности.
Лицата се идеолошки надоврзани на терористичката организација „Исламска држава/ИСИС“ и во изминатиов временски период преземаа активности за верско-радикална индоктринација на млади лица, како и подготвителни дејствија во врска со изведување насилни активности кои содржат елементи на тероризам.
Во текот на понатамошната постапка, надлежните правосудни органи во координација со Министерството за внатрешни работи, преземаат мерки и активности за спроведување на дополнителни истражни дејствија во однос на предметните лица.
Агенцијата за национална безбедност во рамки на своите надлежности и ингеренции за рано превенирање и заштита на безбедноста на државата и граѓаните, останува посветена и континуирано презема сет од мерки и активности, вклучително и за детектирање онлајн-пропаганда и содржини кои се поврзуваат со меѓународни терористички организации и имаат за цел регрутирање, инспирирање или поттикнување на тероризам“, се вели во официјалното соопштение на АНБ.
