Насоките го повторуваат ставот на администрацијата на Трамп дека машкиот и женскиот се единствените два пола и дека тоа не може да се менува. Тоа беше еден од првите потези на Роберт Ф. Кенеди Џуниор откако минатата недела беше потврден за министер за здравство и социјални услуги.
„Оваа администрација го враќа здравиот разум и биолошката вистина на федералната влада“, рече Кенеди. „Тоа е крај на политиките на претходната администрација кои се обидоа да ја вградат родовата идеологија во секој аспект од јавниот живот“, додаде тој.
Трамп се обидува да стави крај на промоцијата на родовата идеологија, термин кој често го користат конзервативните групи за означување на идеологии кои промовираат нетрадиционални погледи на полот и родот. Активистите за човекови права го сметаат терминот дехуманизирачки и анти-ЛГБТК наратив.
Правата на трансродовите лица се контроверзна политичка тема во последниве години. Неколку републиканци се залагаа за промена на законите за трансродовите лица за време на изборната кампања во ноември. Трамп потпиша серија извршни наредби на својот прв ден на функцијата, ставајќи крај на серијата политики насочени кон промовирање на расната еднаквост и заштита на правата на ЛГБТК+ лицата.
Упатствата од вчера ја дефинираат жената како личност чиј пол се карактеризира со репродуктивен систем со биолошка функција на производство на јајце клетки, а мажот како личност чиј пол се карактеризира со репродуктивен систем со биолошка функција на производство на сперматозоиди. „Полот на една личност, женски или машки, е генетски определен при зачнувањето (оплодувањето) и е видлив пред раѓањето“, се наведува во упатствата.
