„Вашата професионална патека отсега носи голема одговорност, бидејќи вие сте иднината на третата власт и само со личниот и професионален интегритет, имуни на сите општествени влијанија, транспарентни и видливи пред јавноста, можете да допринесете во зајакнувањето на довербата во правниот систем и зајакнувањето на демократските принципи. Нека вашиот судиски мандат биде воден од мудроста, правичноста и цврстата посветеност на законот“, се наведува во соопштението на Здружението на судии.
Воедно, здружението го поздравува потегот на членовите на Судскиот совет, „кои и покрај сите политички случувања, беа доследни и професионални во нивната работа и со изборот на нови судии го намалија недостигот на судии во системот кој во последните години макотрпно се справува со приливот на предмети и недостигот на стручен и професионален кадар“.
„Со тоа дадоа и свој допринос во исполнување на роковите дадени од Европската комисија за унапредување на Судскиот систем, од кои реформи зависи и финансиската поддршка од ЕУ во износ од околу 800 милиони евра за земјата“, велат од Здружението на судии.
Здружението на судии упатува апел до новоизбраните, но и до сите актуелни судии, дека само обединети, професионални и независни може да ги остварат целите на дадената судиска заклетва, а тоа е да ги штитат правата и слободите на граѓаните во чие име постапуваат и носат пресуди.
„Заради тоа Здружението ги повикува новоизбраните судии, да се приклучат на нашата организација и со нови идеи и препораки да допринесат во унапредување на соработката со извршната и законодавната власт, Меѓународните организации во земјата, невладиниот сектор, медиумите и академската заедница како клучни фактори во градење на јавното мислење и довербата на граѓаните во системот.
