Царинските службеници од граничниот премин Богородица откриле и спречиле обид за криумчарење златен накит, што двајца турски државјани кои патувале со автомобил со француски регистарски таблички се обиделе да го внесат во Македонија без да го пријават. При личен претрес на патниците, во рачна торбичка на возачот, во пластична кутија биле пронајдени седум златни нараквици со вкупна маса од околу 285 грама. Вкупната вредноста на алките е 2.8 милиони денари, а избегнатите давачки се приближно 706 илјади денари. Златните алки се привремено задржани, а против соспственикот ќе биде поведена соодветна постапка.
Царината дополнително запленила 4.031 разни производи откриени во два одвоени случаи од страна на мобилните царински тимови. Во првиот случај биле откриени 1.175 парчиња разни производи.
На наплатната станица Петровец, мобилен царински тим сопрел автобус со македонски регистарски таблички, кој сообраќал на вонредна линија Скопје – Истанбул – Скопје. При преглед на возилото и на багажот на патниците, во куфери сопственост на македонски државјанин кој патувал со автобусот, биле пронајдени 290 ремчиња за рачни часовници, 420 батерии за апаратчиња за слушање, 360 батерии од 1.5 волти, 75 маски за мобилни телефони и 30 заштитници за камери на мобилни телефони, за кои не поседувал документ за потекло и платени увозни давачки. Непријавените производи се привремено задржани а против сопственикот ќе биде поведена прекршочнапостапка, информираа од Царинската управа.
Во вториот случај биле откриени 2.856 парчиња разни производи.
При контрола на стока во царинската испостава Гевгелија, пријавена за увозно царинење од испраќач од Грција, наменета за увозник од Битола, царинските инспектори од мобилниот тим утврдиле дека 2.856 парчиња разна стока (облека, обувки, паричници, ранци, мини дронови, церади и катанци со аларм за мопеди, делови за возила, алкални батерии, алат, техничка стока и друго) не се опфатени со царинските документи. Истите се привремено задржани, а против увозникот ќе биде поведена прекршочна постапка.
292 парчиња женска облека, фустани, тренерки, комбинезони, елеци, хеланки, здолништа, маици, шорцеви, блузи… открила службата за мобилни скенери на граничниот премин Табановце.
„За влез во државата бил пријавен автобус со српски регистарски таблички кој сообраќал на редовната линија Белград-Скопје, управуван од српски државјанин. При контрола на автобусот во три патни куфери сопственост на возачот, биле пронајдени непријавените производи. Истите се привремено задржани, а против возачот ќе биде поведена прекршочна постапка“, информираа од Царина.
Освен ова минатата недела цариниците заплениле и 38 патрони ловечка муниција, откриени на граничниот премин Меџитлија кај грчки државјанин пријавен за влез во Македонија. На прашање на царинскиот службеник дали има да пријави нешто за царинска контрола, возачот одговорил негативно. Сепак службеникот решил да изврши преглед на возилото, при што во багажниот простор биле пронајдени непријавените патрони муниција кои се привремено здржани, а против патникот ќе биде поведена соодветна постапка.
На граничниот премин Табановце автопат, кај македонски државјанин пријавен за излез од државата мобилните царинсми тимови откриле возило со бункер кое било однесено на царинскиот терминал за преглед со мобилен скенер.
„Притоа, зад брзиномерот, бил откриен специјално изработен бункер кој може да се користи за криумчарење стока. Возилото е привремено задржано, а против возачот ќе биде поведена прекршочна постапка“, информираа од Царинската управа.
Царинските службеници од царинската испостава Богородица привремено задржале 20.146 производи со ознаки на заштитени трговски марки, откриени во камион со турски регистарски таблички натоварен со стока од испраќачи од Турција наменета за фирми од Косово. При контрола на стоката биле пронајдени 20.000 лед светилки и 146 парфеми со ознаки на заштитени трговски марки. Поради сомневање дека производите повредуваат права од интелектуална сопственост, истите се привремено задржани и поведена е постапка за утврдување на нивната оригиналност.
