„Можеби имало корупција, но тоа нема врска со настрешницата. Настрешницата падна поради професионална грешка, не затоа што еден подизведувач платил повеќе или помалку на друг подизведувач“, изјави Вучиќ за телевизијата Инсајдер.
На коментарот дека на денот на несреќата рекол дека настрешницата не била реконструирана, изјави дека не кажал дека не се работело на настрешницата, туку дека не била реконструирана во градежна смисла.
„Во градежна смисла, реконструкцијата не беше извршена. Да беше, немаше да се случи несреќата. Друга работа е што некои додале, за што не знаев, некое стакло за кое мислеле дека никако не ја оптоварува настрешницата“, рече Вучиќ.
Тој повтори дека градежно, настрешницата не била реконструирана.
„Да беше, некој ќе ја провереше статиката, корозијата на каблите… Дали некој сакал да потроши помалку пари или зошто, не сакам да навлегувам во тоа, за да не обвинувам некого, тоа е работа на надлежните органи“, рече Вучиќ.
На коментарот дека работата на настрешницата не е добро завршена, рече дека „секако дека не е добро направена“.
Тој рече дека не треба да работи во име на обвинителството, додавајќи дека судството ќе каже кој е одговорен за сè.
„Важно е да ги испитаме сите наши грешки, сè што беше во процедурата, не само за да бидат казнети одговорните, туку такви настани никогаш, или што помалку, да се случат во иднина“, рече Вучиќ.
Тој рече и дека кој е виновен мора да одговара и да оди во затвор за тоа.
