Истражителите од повеќе земји, предводени од Европол, уапсија 418 осомничени во операција против трговија со фалсификувани лекови и недозволени супстанци, соопшти европската полициска канцеларија.
Истовремено, тие ги повикаа потрошувачите да бидат особено внимателни при ваквите набавки преку интернет.
Операцијата беше спроведена од француски, грчки, италијански и шпански служби за спроведување на законот, а координирана од Европол. Рациите се одвивале во 30 земји меѓу април и ноември минатата година.
Истражувале 52 организирани криминални групи и заплениле стока вредна повеќе од 11 милиони евра.
Во рациите биле запленети повеќе од 400.000 пакувања „нелегални лекови“, приближно 175.000 шишенца и ампули и повеќе од 4,5 милиони таблети, вклучително и лекови против болки, лекови против рак и допинг и психотропни супстанции. Откриени се и демонтирани четири подземни лаборатории.
„Трговијата со фалсификувани лекови е во пораст во ЕУ, што предизвикува огромни трошоци за поединецот и општеството“, соопшти Европол.
Тие додаваат дека организираните криминални групи продаваат супстандардни, погрешно означени или фалсификувани фармацевтски производи, како и производи пренасочени од легитимни малопродажни синџири.
Европол предупредува на клучната улога на социјалните медиуми и онлајн продавниците, и легални и на дарк веб, во продажбата на фалсификувани фармацевтски производи и ги повикува потрошувачите да бидат внимателни кога купуваат онлајн.
