Повеќе од 160 работници се спасени во североисточната бразилска држава Баија, се вели во соопштението на Канцеларијата на јавното обвинителство за труд (МПТ).
Се наведува дека работниците живееле во „понижувачка“ средина и дека градежната компанија им ги одзела пасошите и не им исплаќала плати.
БЈД преку соопштение изјави дека ги прекинала врските со инволвираната компанија и останува посветена на „целосното усогласување со бразилското законодавство“.
Фабриката требаше да започне со работа во март 2025 година и требаше да биде првата фабрика за електрични возила на БЈД надвор од Азија.
Работниците, ангажирани од Џинџијанг констракшн Бразил, живееле во четири објекти во градот Камачара. Во еден таков објект работниците биле принудени да спијат на кревети без душеци, тврдат обвинителите.
Секоја бања ја делеле 31 работник, принудувајќи ги да стануваат исклучително рано за да бидат подготвени за работа.
„Условите пронајдени во сместувањето откриваат алармантна слика на несигурност и деградација“, велат од МПТ.
„Услови слични на ропство“, како што се дефинирани со бразилскиот закон, вклучуваат обврзана робија и работа што го нарушува човечкото достоинство.
Од МПТ додаваат дека ситуацијата претставува и присилна работа бидејќи на многу работници им биле задржани платите и се соочиле со огромни трошоци за раскинување на договорите за работа.
БЈД соопшти дека работниците се преместени во хотели. Компанијата додаде дека извршила детален преглед на условите за работа и живот на подизведувачите и постојано барала од градежната компанија да направи подобрувања.
БЈД, кратенка од (Build Your Dreams – Изгради ги своите соништа), е еден од најголемите светски производители на електрични возила. Продаде повеќе електрични возила од Тесла во последните три месеци од 2023 година, додека двете компании се бореа за првото место во секторот.
Компанијата исто така го проширува своето седиште во Бразил, кој е нејзиниот најголем странски пазар.
