Како што јавува Политико, повикувајќи се на два добро упатени извори, предупредувањето е поврзано со наводни руски обиди да развијат противсателитско нуклеарно оружје за користење во вселената.
Иако изворите не дале понатамошни детали за тие информации, еден од нив тврдел дека САД веќе повеќе од една година се загрижени поради потенцијалното руско развивање и поставување противсателитско нуклеарно оружје, против кое САД и другите западни земји не би можеле соодветно да се бранат.
Во соопштението за јавност, републиканскиот пратеник Мајк Тарнер, кој е на челото на разузнавачкиот одбор на Претставничкиот дом, кажал дека одборот повикал на декласификација на разузнавачките податоци за таа закана за функционерите и пратениците да можат за тоа да разговараат со сојузниците.
Не е јасно што го натерало Тарнер да ја даде таа изјава бидејќи разузнавачките податоци им биле достапни на лидерите на одборот за разузнавачки прашања на Претставничкиот дом и на нивните главни соработници во безбедна соба на Конгресот повеќе од една недела, кажал еден извор на Политико. Разузнавачкиот одбор на Сенатот исто така имал пристап до тие информации, додал изворот.
Членови на разузнавачкиот одбор на Претставничкиот дом во средата гласаа за декласификација на разузнавачките податоци и сега пристап им е овозможен на сите членови на Сенатот.
Можно е Тарнер да се обидувал да крене тревога поради рускиот напредок во вселената за да ја истакне потребата законодавците да одобрат дополнителна помош за Украина. сенатот усвои закон кој вклучува 60 милијарди долари помош за Киев. Во моментов е на разгледување во Претставничкиот дом, каде републиканците најавија остар отпор.
Еден член на разузнавачкиот одбор на Претставничкиот дом кажал дека разузнавачките податоци се „вознемирувачки“. Друг кажал дека „тоа е сериозен проблем, но не и непосредна криза“. И членови на одборот и другите извори запознаени со разузнавачките податоци зборувале за Политико под услов на анонимност имајќи предвид дека станува збор за доверливи информации.
Кремљ вчера реагираше на американските предупредувања на нови руски нуклеарни капацитети во вселената. Дмитриј Песков, портпаролот на рускиот претседател Владимир Путин, го нарече предупредувањето „злонамерна измислица“ и трик со кој Белата куќа се служи за да ги наговори американските законодавци да ѝ одобрат милијарди долари помош на Украина.
Песков додаде дека нема да го коментира извештајот сè додека Белата куќа не го декласифицира, но додаде дека станува збор за очигледен обид за присилување на Конгресот да одобри уште пари за Украина.
„Очигледно е што се обидува да направи Белата куќа. Сакаат на еден или друг начин да го наговорат Претставничкиот дом да одобри закон за уште пари за Украина, тоа е сосема очигледно“, кажа Песков.
Американските власти кренаа тревога во последните години поради проектили лансирани од површината на Земјата кои можат да уништат сателити во орбитата. Во 2021 година Русија изврши тестирање на противсателитска ракета на еден од сопствените сателити, разбивајќи го на илјадници парчиња, кои пак можат да претставуваат сериозна закана за другите објекти во орбитата.
