Според официјалното соопштение, Кина ќе примени царина од 15 отсто за јаглен и течен природен гас и 10 отсто за сурова нафта, земјоделски машини и автомобили со голем обем. Оваа одлука доаѓа како одговор на американските царини наметнати од претседателот Доналд Трамп, кои стапија на сила утрово.
Новите царини за американскиот извоз ќе стапат на сила на 10 февруари, соопшти кинеското министерство.
И додека американските и европските фјучерси на берзанските индекси беа во пораст по вчерашните добри вести од Канада и Мексико, тие утрово повторно се во пад бидејќи инвеститорите стравуваат од трговска војна меѓу САД и Кина, слична на онаа од првиот мандат на Трамп.
„Мислам дека треба да се навикнеме на ова, еден вид ролеркостер поради јавните преговори за тарифи и други политики“, вели Рос Мејфилд, аналитичар во компанијата Берд.
Неколку моменти по официјалното спроведување на тарифите, Трамп објави фотографија со натпис: „Она што најдобро го правиме во Америка е невозможното“.
„Едностраното зголемување на царините на САД сериозно ги крши правилата на Светската трговска организација“, се вели во соопштението на кинеското Министерство за трговија. „Не само што не помага во решавањето на сопствените проблеми, туку ѝ штети на нормалната економска и трговска соработка меѓу Кина и САД“.
Тарифата од 10 отсто што ја нареди Трамп за Кина стапи на сила денеска, иако Трамп сè уште планира да разговара со кинескиот претседател Си Џинпинг во следните неколку дена во обид да ги намали тензиите меѓу двете најголеми светски економии.
Покрај тарифните мерки, кинеската државна управа за регулирање на пазарот објави дека спроведува истрага против Гугл поради сомнеж за прекршување на антимонополските закони. Иако во објавата конкретно не се споменува наметнување тарифи за технолошки производи, најавата дојде само неколку минути откако американските царини од 10 отсто требаше да стапат на сила.
Кинеските власти, исто така, објавија дека започнуваат антимонополска истрага против компанијата Алфабет, која е сопственик на Гугл, и дека компанијата ПВХ Корп, холдинг-компанијата за брендови како Томи Хифигер и Келвин Клајн и американската биотехнолошка компанија Илумина ќе ги стават на својата „листа на недоверливи субјекти“.
Трамп предупреди дека може дополнително да ги зголеми царините за Кина доколку Пекинг не го запре протокот на фентанил, смртоносен опиоид, во Соединетите Држави. „Се надеваме дека Кина ќе престане да ни испраќа фентанил, а ако не, тарифите ќе бидат значително повисоки“, рече тој.
Кина го нарече фентанилот американски проблем и рече дека ќе ги оспори тарифите во Светската трговска организација и ќе преземе други контрамерки, но исто така ја остави отворена вратата за преговори.
За време на првиот мандат на Трамп во 2018 година, трговските односи меѓу САД и Кина ескалираа во целосна тарифна војна. Трамп, следејќи ја својата политика „Америка на прво место“, воведе низа царини за кинески производи во вредност од стотици милијарди долари, што предизвика кинеска одмазда.
За време на администрацијата на Бајден, повеќето од овие тарифи останаа на сила, а некои беа дури и зголемени. Бајден зазеде повеќе насочен пристап, фокусирајќи се на стратешките сектори како што се полупроводниците и електричните возила.
И покрај трговските тензии, економиите на двете земји остануваат длабоко испреплетени. Кина и САД остануваат меѓу најголемите трговски партнери – американскиот увоз од Кина во првите 11 месеци од минатата година изнесува 401 милијарда долари, додека кинескиот увоз од САД достигна 131 милијарда долари.
Трамп синоќа го одложи воведувањето царини за Мексико и Канада, а се заканува и со царини за Европската унија.
