Вајлс ќе биде првата жена на функцијата шеф на кабинетот на Белата куќа. „Сузи Вајлс ми помогна да постигнам една од најголемите политички победи во американската историја и беше составен дел од моите успешни кампањи во 2016 и 2020 година“, се вели во соопштението на Трамп.
Американските медиуми пишуваат дека Сузи Вајлс е најзаслужна за водењето на кампањата на Трамп, која ја оценуваат како најдисциплинирана и најефикасна досега, и дека има репутација на контролирање на неговите најлоши импулси.
Таа во голема мера го избегнуваше фокусот на вниманието, дури и одби да го земе микрофонот за да зборува додека Трамп ја прославуваше својата победа во средата рано наутро.
Некогаш работела во администрацијата на претседателот Роналд Реган, а Трамп ѝ го даде прекарот „Ледената дама“.
Трамп рече дека Вајлс била составен дел од неговите кампањи, опишувајќи ја како цврста, паметна, иновативна жена, на која сите ѝ се восхитуваат и ја почитуваат.
Шефот на кабинетот обично има големо влијание – управува со персоналот во Белата куќа, ги организира времето и агендата на претседателот и одржува контакт со другите владини институции и пратениците.
