Во опширно интервју за Ју-Ес-Еј Тудеј, Венс рече дека е уверен дека претседателот Трамп ќе го отслужи остатокот од својот мандат, додавајќи дека самиот поминал низ извонредно искуство во последните 200 дена.
И покрај неодамнешните прашања за физичката состојба на претседателот, Венс инсистира дека Трамп е во извонредно добра здравствена состојба.
„Тој има неверојатна енергија и додека повеќето луѓе што работат околу претседателот на Соединетите Американски Држави се помлади од него, мислам дека откриваме дека тој е всушност последната личност што оди на спиење, тој последен телефонира навечер, тој прв се буди и прв се јавува наутро“, рече Венс.
„Да, се случуваат ужасни трагедии, но сум многу уверен дека претседателот на Соединетите Американски Држави е во добра форма, дека ќе го отслужи остатокот од својот мандат и ќе направи големи работи за американскиот народ“, додаде тој. „И ако, не дај Боже, се случи ужасна трагедија, не можам да замислам подобра обука за работа од онаа што ја добив во последните 200 дена“, рече тој.
Коментарите на Венс доаѓаат откако во јавноста се појави загриженост за здравјето на Трамп предизвикана од видливи модринки на неговите раце. Во подоцнежните појавувања, модринките изгледаа покриени со лошо нанесена шминка. Модринките првпат се појавија минатото лето, а тогашната портпаролка на кампањата Каролин Ливит, сега портпаролка на Белата куќа, ги припиша на постојаната работа на Трамп и ракувањата во текот на целиот ден, секој ден.
Прашањата повторно беа покренати минатиот месец по серијата фотографии на кои глуждовите на Трамп се гледаа дека се сериозно отечени. Лекарот на претседателот, д-р Шон Барбабела, објави меморандум во кој го поврза отокот со хронична венска инсуфициенција, опишувајќи ја како бенигна и честа состојба за некој на возраст на Трамп.
Според 25 амандман на Уставот на САД, потпретседателот ја презема целосната функција ако претседателот почине, поднесе оставка или биде отстранет од функцијата. Во историјата се забележани девет случаи каде што потпретседател го наследил претседателот за време на неговиот мандат. На пример, Калвин Кулиџ стана претседател откако Ворен Г. Хардинг почина ненадејно на 2 август 1923 година.
Порано овој месец, самиот претседател Трамп го претстави Венс како свој очигледен наследник, пофалувајќи ги притоа и другите членови на кабинетот кои би можеле да го продолжат МАГА проектот по 2028 година.
Кога дописникот на Фокс њуз Питер Дуси го праша кој ќе го предводи движењето во следната претседателска трка, Трамп беше јасен. „Овој викенд, државниот секретар Рубио рече дека мисли дека Џеј Ди Венс би бил одличен кандидат. Можете да го исчистите целото републиканско поле токму сега. Дали се согласувате дека очигледен наследник на МАГА е Џеј Ди Венс?“, праша Дуси.
„Па, мислам да, најверојатно. Да бидам фер, тој е потпретседател и мислам дека и Марко е некој што би можел да соработува со Џеј Ди“, одговори Трамп.
