Според Волстрит џурнал, кој се повикува на високи претставници на администрацијата, вториот повик меѓу двајцата лидери подоцна истиот ден бил посрдечен, при што Трамп го прашал Нетанјаху дали нападот бил успешен.
Израел се обиде да ги убие политичките лидери на исламистичката група Хамас во напад извршен во главниот град на Катар, Доха, во вторник, Хамас соопшти дека неговите врвни лидери го преживеале воздушниот напад, но петмина членови биле убиени, вклучувајќи го и синот на протераниот лидер на Газа и главен преговарач Калил ал-Хају.
Воената операција на Израел во Доха наиде на широка меѓународна осуда и е особено чувствителна бидејќи Катар беше домаќин и посредник во преговорите за прекин на огнот во војната во Газа. Во среда, Нетанјаху го предупреди Катар да ги протера претставниците на Хамас или „да ги изведе пред лицето на правдата. Бидејќи ако не, ние ќе го сториме тоа“. Катар возврати, нарекувајќи ги неговите коментари „непромислени“.
Во меѓувреме, израелскиот амбасадор во САД, Јехиел Лајтер, рече дека ако Израел не успеал да ги убие лидерите на Хамас во вторник, следниот пат ќе успее. „Ги предупредуваме терористите, каде и да се… ќе ги гониме и ќе ги уништиме оние што сакаат да нè уништат“, рече тој. Воздушниот напад се случи кратко откако Хамас ја презеде одговорноста за пукањето на автобуска станица на периферијата на Ерусалим, при што загинаа шест лица.
Британскиот премиер Кир Стармер го осуди израелскиот напад врз Катар и го покрена прашањето со израелскиот претседател Исак Херцог за време на состанокот на Даунинг стрит, нарекувајќи го „целосно неприфатлив“. Портпарол на Даунинг стрит го цитираше премиерот како вели дека „нападите се очигледно кршење на суверенитетот на клучен партнер и не придонесуваат за обезбедување на мирот што сите очајно сакаме да го видиме“.
Односите се дополнително затегнати поради намерата на Велика Британија да им се придружи на другите западни земји во признавањето на палестинската држава, освен ако Израел не ги исполни условите, вклучително и прекин на огнот во Газа. „Кажани се работи кои беа тешки и силни, и јасно е дека можеме да се расправаме, бидејќи кога сојузниците се среќаваат, тие можат да се расправаат. И двете сме демократии“, рече Херцог по состанокот, предлагајќи „мисија за утврдување факти“ во Израел за да се проучи хуманитарната ситуација во Газа.
