Христијанската унија ЦСЦ и социјалистичката ФГТБ протестираат на прво место против предлогот за укинување на пензиските права според посебните прописи и усогласување на старосната граница за пензионирање за сите државни службеници со онаа за вработените во приватниот сектор, сега 66 години. Тоа го сметаат за „општествена регресија“.
„Мислиме дека нашите деца и внуци заслужуваат пензии. Ако не преземеме ништо, нивната цена ќе се зголеми за 14 милијарди евра во следните пет години“, изјави викендов министерот за пензиски систем, Јан Јамбон, кој доаѓа од премиерската партија Н-ВА.
Секторот за култура повика на протест во центарот на градот против реформата на статусот на уметниците. Други протести ќе се одржат пред влезот на зградите на јавната администрација и фирмите.
На штрајк беше повикан и приватниот сектор, на пример пристаништето Антверпен. Откажани се сите комерцијални летови кои поаѓаат од аеродромите Брисел-Завентем и Шарлроа.
Градскиот транспорт во Брисел исто така беше во прекин, а речниот сообраќај меѓу Северното Море и Гент беше прекинат.
24-часовниот генерален штрајк, во кој се очекува да бидат вклучени затворските чувари, вработените во болницата и компаниите за собирање отпад, е дел од големата мобилизација на граѓани што започна зимава против предлогот на коалицијата Де Вевер за обновување на јавните финансии. Белгија е меѓу земјите-членки на ЕУ против кои се покренати постапки поради преголем дефицит.
Врвот на мобилизацијата се случи десет дена по стапувањето на функцијата на новата влада кога на 13 февруари на протестот во Брисел учествуваа 60.000 луѓе, соопшти полицијата.
„Степенот и бројот на мерки на социјална регресија предвидени од федералната влада се незамисливи“, рече синдикатот ФГТБ, кој исто така е загрижен поради предлогот правото на надоместок за невработеност да се ограничи на две години.
