„Трамп и неговите луѓе им пристапија на владините институции со идејата од Силиконската долина, „движи се брзо и крши работи“. И тие кршат сè по ред“, рече Бајден пред публиката составена од адвокати и експерти кои работат на заштита на правата на лицата со посебни потреби. „Прво пукаат, а потоа нишанат“.
Иако Трамп тврди дека нема да ги допре бенефициите за 73 милиони Американци кои користат социјална помош, многу граѓани се сè позагрижени. Локалните канцеларии за социјални услуги се претрупани со повици, а поради предвременото пензионирање на многу вработени, поттикнато од администрацијата на Трамп, чекањата на телефонски повици и редовите стануваат подолги.
Трамп исто така најави „ревизија“ на системот за социјално осигурување, за кој многумина стравуваат дека може да ги скрати тешко стекнатите права на милиони Американци.
Бајден потсети дека за време на неговиот мандат, Социјалната управа го подобрила системот на борбата против измами, го скратила времето на чекање и го рационализирала системот за жалби: „Сè функционираше поефикасно и поправедно“.
Откако ја напушти Белата куќа во јануари, 82-годишниот Бајден се држеше подалеку од јавноста – тој е виден во театар на Бродвеј, ресторани во Делавер и Џорџтаун и често патува со воз на Амтрак помеѓу неговиот дом во Делавер и неговата канцеларија во Вашингтон. Но, зад сцената тој остана политички активен: тој е во контакт со поранешни советници и високи функционери како Брус Рид, Стив Рикети, Џејк Саливан и Ентони Блинкен.
Тој соработува и со новиот претседател на Демократскиот национален комитет, Кен Мартин, на кого му понуди поддршка по неговата победа на изборите.
Бајден пишува мемоари за својот претседателски мандат во соработка со Агенцијата за креативни уметници, но одби да учествува во бројните книги што новинарите ги напишаа за изборите во 2024 година и крајот на неговиот мандат.
На говорот во Чикаго му претходеа помали јавни настапи – прими награда од Меѓународното братство на електричари во Вашингтон и говореше на состанокот Модел на Обединетите нации во Њујорк. Говорот во Чикаго го означува почетокот на неговите професионални говори за кои ќе биде платен, а се очекува да следат уште повеќе.
Во кампањата во 2020 година, Бајден честопати предупредуваше колку опасен би бил вториот мандат на Доналд Трамп за американската демократија: „Ќе преживееме четири години од Трамп, но ако му дадеме осум, тој засекогаш ќе го промени карактерот на нашата нација“.
Но, сега, иронично, многумина во неговата партија го обвинуваат Бајден за враќањето на Трамп. Со инсистирањето да се кандидира во 2024 година, а потоа се повлече под притисок на партијата поради се погласните предупредувања за неговото здравје и возраст, не остави доволно време за вистинска внатрепартиска трка.
Камала Харис, која стана кандидат на Демократската партија со негова поддршка, сè уште верува дека би го победила Трамп доколку имаше повеќе време за кампања, велат нејзините блиски соработници. Таа ретко се појавува во јавноста по својот изборен пораз, додека нејзиниот поранешен потпретседател, гувернерот на Минесота, Тим Волц, веќе одржува митинзи во републиканските држави.
