Во последните денови, сè повеќе кружат слики од тела на деца кои починале од неухранетост.
Иако помошта доаѓа од целиот свет, таа е симболична и најчесто доаѓа од воздух – со испуштање пакети од авиони.
Тоа е дури 40 пати поскапо од испораката со камиони, дури и не е безбедно: падобрани не се отвораат, пакети паѓаат во морето, луѓето умираат обидувајќи се да ги извлечат. Според ОН, во еден инцидент, пет лица загинале кога палета им паднала врз главите.
Дванаесет лица се удавија минатата година додека спасуваа пакети брашно од морето.
Од 7 октомври 2023 година, кога Хамас започна напад врз Израел, пристапот до Газа е забранет за странските новинари. Ова е без преседан во современото војување – зона на целосна информативна блокада. Би-би-си известува дека светот денес ја гледа Газа само од воздух – како поле од пепел, урнатини и кратери. Според проценките, дури 92 отсто од сите цврсти градби биле уништени или сериозно оштетени.
Во Газа, според проценките, досега се убиени повеќе од 60.000 лица. Војната влезе во нова фаза – гладот се користи како средство за притисок. Израел вели: хуманитарните коридори ќе бидат отворени само кога Хамас ќе ги ослободи заложниците. Хамас одговара: ќе ги ослободиме заложниците кога ќе им биде дозволено на конвоите да поминат.
Во меѓувреме, два милиони луѓе во Газа живеат без електрична енергија, вода, храна и основни лекови. Хуманитарната криза расте од ден на ден, додека меѓународната заедница останува немоќна – или незаинтересирана.
Војната во Газа одамна ги премина границите на конфликт. Ова се претвори во хуманитарен колапс, пред очите на целиот свет.
