Документот, во кој Вашингтон пост имал увид, ја носи ознаката „тајно/без пристап на странски државјани“, а бил дистрибуиран низ Пентагон кон средината на март со потпис на Хегсет. Во него се изложува спроведување на визијата на американскиот претседател Доналд Трамп за подготовка за потенцијална војна со Кина и за одбрана на интересите на Соединетите Американски Држави во блиското соседство, што ги вклучува Гренланд и Панамскиот канал. Се повикува војската и директно да се вклучи во борбата против нелегалната миграција и шверцот на дрога.
За разлика од првиот мандат на Трамп и администрацијата на претходниот американски претседател Џо Бајден, кои Кина ја сметаа за главна закана, но истовремено вложуваа во сојузите и глобалното присуство, Хегсет јасно дава предност на само едно сценарио: спречување на кинески напад на Тајван. Сè останато е второстепено.
Пентагон, како што се наведува, „ќе преземе ризик во други области“ поради ограничувањата во персонал и ресурси и ќе врши притисок врз сојузниците во Европа, Блискиот Исток и источна Азија да ја засилат сопствената одбрана и да го преземат поголемиот дел од работата во одвраќањето закани од Русија, Северна Кореја и Иран.
За Европа тоа значи целосен пресврт. Додека стратегијата на Бајден од 2022 ги нарекуваше НАТО и сојузниците „најголема глобална стратегиска предност“, Хегсет сега бара сојузниците да преземат „далеку поголем“ дел од товарот. САД, како што е јасно истакнато, повеќе нема да испраќа поголеми воени сили на Стариот континент бидејќи се приоритет на други места.
Во документот јасно се признава дека е малку веројатно дека САД ќе пружат значителна, ако воопшти пружат, помош на Европа во случај на руска воена офанзива. Наместо тоа, Вашингтон планира да ја префрли примарната одбранбена одговорност на НАТО сојузниците. Се наведува дека САД на Европа ќе ѝ пружат нуклеарно одвраќање, но дека НАТО може да смета само на американските сили кои не се потребни за одбрана на Америка или одвраќање на Кина.
Значителното зголемување на европскиот удел во одбранбениот товар, наведува документот, „ќе обезбеди НАТО да може сигурно да одврати или порази руска агресија дури и ако САД се веќе ангажирани во друг глобален конфликт“.
Пентагон, според документот, се подготвува исклучиво за една голема војна – таа со Кина. При планирањето на идната воена структура и распределбата на средства за заканата од Русија, таа им се препушта на европските сојузници.
Документот се предвидува дека противтерористичките операции ќе се ограничат на групи кои директно ги загрозуваат САД. Милитантите од Африка и Блискиот Исток кои дејствуваат само регионално нема повеќе да бидат приоритет.
Наспротив претходното инсистирање на глобално присуство, упатствата на Хегсет повикуваат на повлекување од повеќето светски региони, вклучувајќи го Блискиот Исток. Сепак, американската влада продолжи со напади на хутите во Јемен и притисок врз Иран, што предизвикува збунетост и критики и од републиканците и демократите во Конгресот. Еден помошник во Конгресот за Вашингтон пост изјавил: „Сакаат американска сила секаде, но во исто време и никаде. Таквата контрадикција го отежнува смислувањето на доследна стратегија“.
Документот е долг девет страници, а анализата на Вашингтон пост покажува дека во него се наоѓаат цели извадоци речиси идентични на извештајот на Фондацијата Херитиџ од август 2024. Александер Велез Грин, еден од авторите на тој извештај, сега привремено е највисок службеник на Пентагон за одбранбена политика.
Извештајот на Фондацијата, како и упатствата на Хегсет, наведуваат три приоритети: одвраќање на кинеска инвазија на Тајван, одбрана на САД и поголем придонес на сојузниците.
Во регионот на Пацификот, каде Хегсет неодамна ги посети американските трупи и им кажа дека се „врвот на копјето“ на американските операции, се планира јакнење на военото присуство со помош на подморници, бомбардери, беспилотни бродови и специјализирани единици. Фокусот е на оружје кое може да уништи утврдени и подземни цели. Се вложува и во однапред поставени залихи и логистички капацитети.
Во документот се наведуваат и неодредени закани од американското „блиско соседство“, како Гренланд и Панамскиот канал, каде Хегсет бара спремност за одбрана на американските интереси. Трамп во петокот дополнително ги заостри односите со Данска, која управува со надворешната политика на Гренланд, кажувајќи „Ние мора да го имаме Гренланд“.
Упатствата повикуваат и на проширување на американскиот нуклеарен арсенал и системите за одбрана од проектили во концептот Златна купола, кој Трамп претходно го најави, но уште не е конкретизиран.
Пентагон и Фондацијата Херитиџ не го коментираа документот.
