Американскиот државен секретар Марко Рубио во март изјави дека администрацијата на претседателот Трамп откажала повеќе од 80 отсто од сите програми на Агенцијата на САД за меѓународен развој, позната како УСАИД. „За многу земји со ниски и средни приходи, шокот би бил на ниво на глобална пандемија или голем вооружен конфликт“, изјави Давиде Расела, коавтор на извештајот на Лансет.
Намалувањата на финансирањето „се закануваат нагло да го запрат, па дури и да го поништат напредок од две децении во здравството кај ранливите популации“, додаде Расела, истражувач во Институтот за глобално здравје во Барселона.
Извештајот беше објавен пред состанокот на десетици светски лидери оваа недела во шпанскиот град Севиља на конференцијата за помош предводена од Обединетите нации, најголемата во последната деценија.
Анализирајќи податоци од 133 земји, тимот истражувачи процени дека финансирањето од УСАИД спречило 91 милион смртни случаи во земјите во развој помеѓу 2001 и 2021 година. Тие исто така користеле моделирање за да предвидат како намалувањето на финансирањето од 83 проценти, објавено од владата на САД претходно оваа година, би можело да влијае на стапките на смртност.
Проекциите покажаа дека намалувањата би можеле да доведат до повеќе од 14 милиони смртни случаи кои може да се избегнат до 2030 година. Таа бројка вклучува повеќе од 4,5 милиони деца на возраст под пет години, или околу 700.000 деца годишно.
Администрацијата на Трамп, која претходно ја вклучуваше иницијативата за намалување на трошоците на милијардерот Илон Маск, се обиде да го намали бројот на вработени во федералната администрација. Таа, исто така, го обвини УСАИД дека поддржува либерални проекти.
Минатиот месец, официјален претставник на ОН изјави за Би-би-си дека стотици илјади луѓе „полека гладуваат“ во бегалските кампови во Кенија, откако намалувањето на финансирањето од страна на САД ги намали оброците на најниско ниво досега. Во болницата во Какума, во северозападна Кенија, новинарите на Би-би-си виделе бебе кое едвај се движи, покажувало знаци на неисхранетост, нејзината кожа била збрчкана и излупена.
