Активистите пред заминувањето најавија дека ќе се обидат да стигнат до бреговите на Појасот Газа за да достават помош и да ја подигнат меѓународната свест за тековната хуманитарна криза. „Го правиме ова затоа што без разлика какви се шансите, мора да продолжиме да се обидуваме“, рече Тунберг, расплакнувајќи се за време на говорот.
„Моментот кога ќе престанеме да се обидуваме е моментот кога ја губиме нашата човечност. И без разлика колку е опасна оваа мисија, таа не е ни приближно толку опасна колку молкот во целиот свет пред лицето на геноцидот што се пренесува во живо“, додаде таа.
Израел жестоко ги негираше обвинувањата за геноцид. Кон средината на мај, незначително ја ублажи блокадата на Газа по речиси три месеци, дозволувајќи да помине ограничена количина хуманитарна помош. Експертите предупредија дека Газа е во опасност од глад доколку не се достави повеќе помош.
Агенциите на ОН и големите хуманитарни групи велат дека израелските ограничувања, отсуството на закон и ред и широко распространетите грабежи го отежнуваат доставувањето помош за околу два милиони Палестинци во Газа. Активистите очекуваат дека ќе им требаат седум дена за да стигнат до својата дестинација со едрилица, доколку не бидат запрени.
Патувањето предизвика мешани реакции. Меѓу нив, истакнатиот републикански сенатор и долгогодишен сојузник на Трамп Линдзи Греам го даде следниот коментар: „Се надевам дека Грета и нејзините пријатели знаат да пливаат“, напиша Греам на платформата Икс.