Претседателот Франк-Валтер Штајнмаер, зборувајќи на церемонијата во седиштето на НАТО во Брисел по повод годишнината, изјави дека Германија сака да стане „столбот на европската одбрана“ во време кога руската агресија врз Украина продолжува.
„Денес, со Путиновата војна против Украина која беснее со полна сила, а САД вршат жесток притисок врз своите европски сојузници, Германија е во клучна позиција“, рече тој, обраќајќи им се на сојузниците.
„Ја примивме пораката, можете да сметате на нас. Ќе се стремиме Германија, нејзините вооружени сили и инфраструктура, да бидат столб на конвенционалната одбрана во Европа“, рече Штајнмаер, објави Ројтерс.
Германија неодамна одобри планови за зголемување на буџетот за одбрана за 500 милијарди евра.
Зголемувањето на германските инвестиции во одбраната доаѓа во време кога европските земји сè повеќе ја преземаат одговорноста за сопствената безбедност.
Американскиот претседател Доналд Трамп постојано предупредува дека САД нема засекогаш да ја гарантираат безбедноста на Европа ако европските членки на НАТО не ги зголемат своите трошоци за одбрана.
Според податоците на НАТО, Германија во последните години се соочува со критики за релативно ниските инвестиции во одбраната, и покрај својата економска сила.
Новата стратегија, која вклучува и модернизација на инфраструктурата и набавка на ново оружје, има за цел да ја исполни обврската за издвојување на 2 проценти од БДП за одбраната, за што сојузниците се согласија уште во 2014 година.
