По вонредната седница, одборот објави дека сите банкарски сметки се блокирани поради тужби од работници чии придонеси не се платени, а се закануваат и блокади од добавувачите на гас, електрична енергија и други основни услуги. Долгот кон Европската радиодифузна унија (ЕБУ) изнесува повеќе од 10 милиони евра.
Радиотелевизија на Република Српска има најголем долг кон државната телевизија, околу 47,5 милиони евра, а од Радиотелевизија на Федерацијата БиХ бара околу 7 милиони евра. Проблемот е што надоместокот на територијата на одреден ентитет го собираат ентитетските радиодифузери и тие не ги плаќаат договорените 50 отсто од износот на сметката на БХРТ.
На последната седница на централната влада, министерот за транспорт и врски Един Форто завчера побара БХРТ да добие помош од буџетот, но оваа иницијатива беше одбиена од српските министри.
Доколку не се постигне итно политичко решение, БХРТ се соочува со можност целосно да биде затворена, а во тој случај Радио-телевизијата на Федерацијата Босна и Херцеговина би можела да ја доживее истата судбина. Со оглед на тоа што БХРТ и РТВ на Федерацијата Босна и Херцеговина делат исти продукциски капацитети, затворањето на БХРТ значи и затворање на Радио-телевизијата на Федерацијата БиХ.
Ситуацијата во БХРТ е одраз на целокупните односи во Босна и Херцеговина и индикатор за нефункционалноста на државните институции. Бројни други институции се блокирани или неефикасни, како што се Советот на министри, државниот парламент, судските и полициските институции. Ситуацијата особено се влоши по вонсудската пресуда против лидерот на Република Српска, Милорад Додик, и се претвори во најсериозната криза од потпишувањето на Дејтонскиот мировен договор во 1995 година.
