Според истите извори, Пекинг побарал и кинеските авиокомпании да престанат да купуваат авионска опрема и делови од американски производители. Луѓето вклучени во дискусиите зборуваа под услов на анонимност бидејќи се работи за доверливи информации.
Одлуката е донесена откако Кина во текот на викендот воведе царини од 125 отсто за американски производи. Тие тарифи ќе ги удвојат трошоците за набавка на американски авиони и делови, поради што на кинеските авиопревозници ќе им биде неисплатливо да набавуваат авиони Боинг.
Пекинг исто така разгледува начини да им помогне на компаниите кои изнајмуваат авиони на Боинг и сега се соочуваат со повисоки трошоци, велат изворите. Акциите на Боинг паднаа за 4,6% во тргувањето пред отворањето на берзата, откако Боинг ја објави веста за кинескиот потег. До понеделник, акциите на Боинг паднаа за 10 отсто од почетокот на годината.
Брзиот развој на трговскиот конфликт меѓу САД и Кина уште еднаш го доведе Боинг во центарот на проблемот, иако ситуацијата е променлива и може брзо да се развива. Трамп веќе повлече некои претходно воведени тарифи, вклучително и оние за Ајфон уредите кои Епл ги увезува од Кина.
Околу десет авиони Боинг 737 Макс моментално се подготвени да влезат во кинеската авио-флота, вклучително и по два за превозниците Чајна судерн ерлајнс, Ер Чајна и Шиамен ерлајнс, според Групата за воздухопловни летови.
Некои од авионите се паркирани во близина на фабриката на Боинг во Сиетл, додека други се во завршниот центар во градот Жоушан, во источна Кина, според веб-страницата на компанијата, која го следи производството. Документите и плаќањата за некои од овие авиони можеби биле завршени пред кинеските тарифи да стапат на сила на 12 април, за да можат да бидат испорачани во Кина, велат некои извори.
Управата за цивилно воздухопловство на Кина не одговори на барањето испратено по факс. Боинг одби да ја коментира ситуацијата. Претставниците од Чајна садерн, Ер Чајна и Шиамен ерлајнс не одговорија на барањата за коментар.
Блумберг минатата недела објави дека кинескиот авиопревозник Џунјао Ер ја одложил испораката на Боинг 787-9 Дримлајнер кој требаше да биде преземен за околу три недели.
За Боинг оваа ситуација претставува нов удар на еден од најголемите пазари за продажба на авиони. Според прогнозите, Кина ќе има 20% од глобалната побарувачка за патнички авиони во следните две децении, а веќе во 2018 година речиси четвртина од производството на Боинг заврши на кинескиот пазар.
Но, американската компанија не објави ниту една голема нарачка од Кина во последните години, како резултат на трговските тензии и сопствените проблеми.
Кина беше првата што го приземји 737 Макс по две сериозни несреќи во 2019 година. Споровите со сегашната и претходната администрација на САД дополнително ги зголемија кинеските нарачки за европски Ербас. Минатата година, Боинг повторно беше под лупа за проблеми со квалитетот, откако панелот на вратата испадна од трупот на авионот за време на лет.
Оваа напната ситуација, исто така, покажува дека Кина сè уште е во голема мера зависна од странските производители на авиони за да ги задоволи барањата на своите граѓани за авионски патувања.
Иако Ербас во моментов е поважниот снабдувач, а домашниот кинески производител Комак Ц919 треба да помогне во сегментот на помали авиони, кинеските авиокомпании сè уште имаат стотици авиони Боинг во својата флота за кои е потребно редовно одржување, поправки и замени.
Боинг сè уште има голем број готови авиони на залиха кои првично беа наменети за кинеските авиокомпании. Компанијата претходно предупреди дека понатамошната ескалација на трговскиот спор може дополнително да ги загрози глобалните синџири на снабдување, кои веќе сериозно се нарушени за време на пандемијата и дури сега почнуваат да се стабилизираат.
