За време на својата прва посета на Австрија откако започна руската инвазија во февруари 2022 година, Зеленски на Телеграм објави дека по средбите со австрискиот претседател Александар Ван дер Белен и канцеларот Кристијан Штокер, потпишани се договори за деминирање, енергија и сајбер безбедност.
Денес, Зеленски треба да учествува на самитот на Г7, кој започна вчера во Канада. Тој најави дека една од темите ќе биде пакетот за одбрана што Украина е подготвена да го купи од Соединетите Држави. „Ќе разговараме за тоа со Трамп. Сигурен сум дека ќе имаме таква можност, барем сметам на тоа“, рече Зеленски. Меѓутоа, Белата куќа објави дека Трамп го напушти самитот порано.
На прес-конференцијата со Зеленски, Ван дер Белен потсети на традицијата на воена неутралност на Австрија, но нагласи дека неговата земја „во никој случај не е политички неутрална“ и дека стои зад Украина во нејзината одбрана од Русија, вклучително и преку санкциите на Европската унија против Москва.
Австрискиот претседател, чија улога е во голема мера церемонијална, ја осуди агресијата на Русија против Украина и го повика Кремљ да „ја прекине оваа нелегална војна и да започне сериозни и искрени преговори“. Тој вети поддршка од Австрија за спроведување на санкциите на Европската унија, како и помош во реконструкцијата на Украина кога ќе заврши војната. Но, во моментов нема индикации дека ова би можело наскоро да се случи.
Зеленски им се заблагодари на Австрија и на нејзиниот претседател за „непоколебливата поддршка за праведната позиција на Украина во борбата за независност“. Зборувајќи за преговорите со Русија за можна размена на затвореници, Зеленски рече дека руските преговарачи во еден момент предложиле размена на украински деца за заробени руски војници, што тој го нарече „лудило“.
„Тоа е несфатливо, нелегално според меѓународното право и, искрено, целосно во согласност со нивното вообичаено однесување“, рече тој.
Австрија е позната по својата неутралност, која ја прогласи во 1955 година по Втората светска војна, но Виена е под остри критики од почетокот на руската инвазија поради одржување на врски со Москва.
Австрија, која беше анексирана од нацистичка Германија во пресрет на Втората светска војна, прогласи неутралност по војната под притисок на западните сојузници и Советскиот Сојуз. Нејзината намера беше да ја преземе улогата на посредник меѓу Истокот и Западот и ги одржуваше врските со Москва дури и по завршувањето на Студената војна.
Иако австриската влада ја осуди руската инвазија на Украина, таа постојано ја нагласуваше потребата од зачувување на дипломатските односи со Москва. Виена испраќа хуманитарна помош до Украина, но не и оружје.
Поранешниот канцелар Карл Нехамер беше првиот лидер на земја-членка на ЕУ кој се сретна лично со рускиот претседател Владимир Путин по избувнувањето на војната. Во април 2022 година, отпатува во Москва во неуспешен обид да го убеди Путин да ја запре инвазијата.
