Снајдер, познат по книгите „Крвави земји“ и „Црна земја“ и долгорочните анализи на советската и постсоветската политика, објави два коментари на социјалната мрежа Икс за начинот на кој се користи терминот „размена на територии“.
„Фразата „размена на територии“ се користи за да го означи следново: Украина отстапува територија нелегално окупирана од Русија, а исто така отстапува и територија што воопшто не е окупирана. Тоа не е размена“, напиша Снајдер.
1/2. The phrase “land swap” is being used to mean “Ukraine concedes land illegally occupied by Russia and also concedes territory that is not even occupied.” That is not a swap.
— Timothy Snyder (@TimothyDSnyder) August 17, 2025
„Секој пат кога некој ќе ја користи фразата „размена на територии“, нека прецизира точно која руска територија би ја добила Украина. Досега, тоа е само еуфемизам за принудување на Украина да ѝ предаде нешто на Русија“, додаде тој.
Коментарите на Снајдер доаѓаат во време кога американскиот претседател Доналд Трамп и неговите соработници јавно со денови изјавуваат дека мирот во Украина ќе дојде само преку „размена на територии“. Трамп ја повтори оваа идеја по неодамнешната средба со Владимир Путин на Алјаска, а разговорите во Белата куќа со Володимир Зеленски, како и консултациите со лидерите на ЕУ и НАТО, беа водени во иста насока.
Според дипломатски извори, Путин го бара целиот Донбас – регионот кој прогласи независност во 2014 година. За возврат, тој нуди само ограничени повлекувања на фронтовските линии во Запорожје и Херсон.
Снајдер истакнува дека не станува збор за никаков вид размена, бидејќи во оваа шема, Украина „разменува“ своја територија – онаа што е окупирана и онаа што не е, и тоа за – ништо. Со други зборови, тоа е еднострано отстапување на територија на агресорот.
Терминот „размена на територија“, тврди Снајдер, затоа ја прикрива вистинската природа на предлогот: не станува збор за компромис, туку за притисок врз Украина да се откаже од својатсуверена територија, додека Русија не дава ништо за возврат.
