Според извори на американскиот портал, Техеран сака да му понуди на Вашингтон разговори за привремен нуклеарен договор пред да ги продолжи преговорите за сеопфатен договор. Иран смета дека е нереално да се постигне сложен и технички прецизен нуклеарен договор во рокот од два месеци што го постави американскиот претседател Доналд Трамп и сака повеќе време за да се избегне ескалација, според изворите на Аксиос.
Привремениот договор меѓу Соединетите Држави и Иран би можел да вклучи запирање на дел од процесот на збогатување ураниум во Техеран, намалување на иранските залихи на збогатен ураниум за 60 отсто и давање на инспекторите на ОН поголем пристап до нуклеарните капацитети на земјата, велат изворите.
Изворите на Аксиос сугерираат дека привремената спогодба најверојатно ќе го вклучи и барањето од Иран Трамп да ја запре кампањата за „максимален притисок“ врз иранската економија. Претходно, американскиот претседател во порака до иранскиот врховен лидер, ајатолахот Али Хамнеи, постави рок од два месеци за склучување на нов нуклеарен мировен договор.
Подоцна, во интервју за Ен-би-си, американскиот претседател предупреди дека доколку Вашингтон и Техеран не постигнат договор за иранската нуклеарна програма, САД ќе спроведат моќно бомбардирање против Иран. Али Шамхани, советник на врховниот лидер на Иран, рече дека Техеран ја разгледува можноста да ја прекине соработката со Меѓународната агенција за атомска енергија (МААЕ) доколку продолжат заканите од другите земји.
Тој додаде дека континуираните воени закани против Иран „може да доведат до мерки на одвраќање“, според Аксиос. Индиректните преговори меѓу Иран и САД треба да започнат в сабота во Оман.
Иранскиот министер за надворешни работи Абас Арагчи потврди дека Техеран и Вашингтон ќе разговараат в сабота во Оман. Според него, контактите ќе се одвиваат преку посредници.
Белата куќа инсистира претставниците на САД и Иран да одржат директни разговори во сабота.
Се очекува министерот за надворешни работи на Оман да посредува во разговорите. Иранската делегација ќе ја предводи министерот за надворешни работи, додека американскиот тим ќе го предводи специјалниот пратеник на американскиот претседател за Блискиот Исток, Стивен Виткоф.
