Доцна синоќа студентите стигнаа до просториите на Радио-телевизија Србија (РТС) во Кошутњак, каде што застанаа пред капијата, објави доцна синоќа порталот РТС. Тие синоќа ги блокираа влезовите во зградата на РТС во Белград, додека студентите што го блокираа Универзитетот во Нови Сад синоќа ги блокираа двата влеза во зградата на Радио-телевизија Војводина (РТВ).
Пред зградата на РТС во центарот на Белград синоќа се случи инцидент кога жандармеријата проби жив ѕид од студентите што ги блокираа влезовите на јавниот сервис. Откако некои медиуми објавија дека полицијата со палки удира студенти, министерот за внатрешни работи Ивица Дачиќ доцна синоќа изјави дека не е точно дека полицијата ги нападнала студентите, туку дека било обратно. Еден полицаец е повреден.
Десетици студенти и граѓани синоќа се собраа и пред Радио-телевизија Крагуевац (РТК) во знак на солидарност со студентите што ги блокираат јавните сервиси во Белград и Нови Сад.
Голем број полицајци беа распоредени во дворот на зградата на РТС во Кошутњак.
Сообраќајот на улицата Таковска во Белград, каде што се наоѓа централната зграда на РТС, утрово околу 4 часот е нормализиран, јавуваат медиумите.
РТС пренесе апел до студентите „да се откажат од насилната блокада“, наведувајќи дека е „целосна спротивност со претходните изјави на студентите во блокадата дека се залагаат за слободно функционирање на институциите“.
Синоќа околу 23 часот студентите ги блокираа влезовите во РТС на улиците Таковска и Абердарова, а на социјалните мрежи најавија дека мирната блокада ќе трае 10 часа.
Тие рекоа дека излезите ќе бидат достапни за сите вработени, но дека никој нема да влезе сѐ додека „РТС не се ослободи“.
Оваа студентска акција најверојатно ја предизвика однесувањето на водителката и на претседателот Вучиќ, кои за време на програмата во живо ги нарекоа студентите „џган“, а употребуваа и други погрдни термини.
Министерот за внатрешни работи Ивица Дачиќ изјави дека не е точно дека полицијата ги нападнала студентите и дека немало полициска интервенција.
„Бидејќи некои медиуми веднаш почнаа да лажат, морам да кажам дека немаше полициска интервенција. Како и секогаш…“, рече Дачиќ, но не успеа да ја доврши реченицата.
Министерот зборуваше пред камерите на ТВ Пинк, стоејќи покрај српскиот претседател Александар Вучиќ, кој го прекина и рече: „Извинете, не можам повеќе да го слушам ова правдање“, а потоа си замина. Дачиќ потоа рече: „Тие (студентите) ја нападнаа жандармеријата“.
Сепак, на снимката објавена на социјалните мрежи, јасно се гледа дека во еден момент полицијата тргнува во јуриш низ толпата студенти, удирајќи ги со пендреци.
Исто така, на социјалните мрежи се појавија и видеа на кои се гледа како повредениот полицаец во цивил Лазар Бачиќ е удрен од припадник на жандармеријата.
