Во последното четвртфинале меѓу домаќинот Куманово и Пелистер трибините беа полни. По неколку минути од почетокот на средбата дојде до првиот прекин, откако навивачката група „Кумани“ распостели огромно знаме речиси преку цела трибина. Тоа ги покри камерите на националниот сервис и поради тоа имаше прекин додека траеше кореографијата на домашните.
Бргу потоа следуваше нов прекин, во моментите кога требаше на трибините да пристигне и навивачката група „Чкембари“. Дојде до некаков судир со органите на редот, а веднаш потоа стана јасно дека гостите нема да се најдат на трибината.
Поради тоа играчите на Пелистер се повлекоа во соблекувалната и не сакаа да играат.
Судиите го започнаа официјалното одбројување на петнаесетте минути, а пред истекот на ова време пелистерци се вратија на теренот и средбата продолжи без битолските навивачи на трибината.
