„По наредбата од страна на претседателката и врховен командант на вооружените сили, Гордана Сиљановска Давкова, за ангажирање на Армијата за справување со пожарите во реонот на неготинско, началникот на Генералштабот, генерал-потполковник Васко Ѓурчиновски нареди ангажирање на потребни капацитети на Армијата.
Притоа, стотина припадници на Армијата и два хеликоптери МИ 8/17 од воздухопловниот ВИНГ во раните утрински часови во координација со сите инволвирани субјекти отпочнаа со координиран и насочен ангажман во гаснењето на пожарот во поширокиот реон на неготинско и планината Серта.
Армијата согласно својата мисија и задачи останува максимално подготвена во извршувањето на својата уставна обврска и задачи од мисијата која вклучува и нејзино ангажирање во помош на граѓаните и институциите при справување со елементарни непогоди секогаш кога било потребно“, се вели во соопштението на Генералштабот.
Инаку, во гаснењето на пожарот покрај армијата и пожарникарите, ангажирани се и сили на полицијата, како и општините Кавадарц и Неготино кои од утрво излегоа на терен со механизација и цистерни, а се придружија и доброволци, како и ловџии. На теренот е пристигнато и едно противпожарно возило од Пехчево, како и од подружницата на Национални шуми од Демир Капија.
Вообичаено, при вакви пожари, распалувањето на огнот е со покачување на температурата во воздухот, околу пладне, велат пожарникарите.
Од СВР Велес потврдија дека од 08:50 часот утринава е пуштен за сообраќај патот Неготино – Штип, што синоќа беше затворен за сообраќај поради пожарите.
