„Се покажа дека речта, зборот, е најважна во библијата. Уште еднаш се покажа дека кога ќе седнете и разговарате водени од добра волја – бона фиде, а не од мала фиде, ќе направите еден голем исчекор кон пронаоѓање заеднички важни решнија. Јас не сум случајно овде, дојдов за да разговарам, и се разбира дека сега го очекувам претседателот Радев да дојде во Скопје. Мислам дека, и сигурна сум дека, како што честопати велам, мислата може да биде побрза од светлината. ако се слушаме, ако се почитуваме, ако имаме волја да се разбереме, тогаш решението е на дофат“, истакна Сиљановска Давкова.
Прашана околу што се согласиле со Радев, таа посочи дека се обединиле околу европската интеграција, копенхашките критериуми, регионалниот пристап на решавање на проблемите.
„Се обединивме околу фактот дека научените бугарски лекции на европскиот пат ќе ги добиеме, нема да треба да ги повторуваме грешките и оти ќе трагаме по компромис и заедничко решение без никој да се чувствува навреден или повреден и без никој да мисли дека бил заборавен“, рече таа.
Околу посетата на Радев на Скопје истакна дека „датумот не е утврден, но, одредиле околу што би можело да биде доаѓањето“.
„Искрено секој од нас го кажа своето видување, со респект се сослушавме, но факт е дека ние ги претставуваме националните интереси на едната и на другата држава, но и факт е дека дијалогот е клучното решение“, рече Сиљановска Давкова.
Таа додаде дека денеска не разговарале за прашањето на внесување на Бугарите во Уставот, ниту за други конкретни прашања.
Во врска со нејзиниот став за промената на Уставот, Сиљановска Давкова рече дека одлуките за овие прашања ги носат пратениците во Парламентот и не зависат од ставови на подинци.
„Вклучувањето на Бугарите во Уставот не зависи од мене. Јас да сум апсолутен монарх можам да го сменам Уставот, но пратениците ги претставуваат граѓаните, гласаат по сопствено убедување. Не можам да ја суспендирам парламентарната демократија, но се разбира дека разговаравме за сите прашања, велам разговаравме, бидејќи ние не може да донесме решение, ниту да го наметнеме на останатите и на нацијата. Но, разговаравме и тоа е здраво“, изјави претседателката Гордана Сиљановска Давкова по средбата во Софија со шефот на бугарската држава Румен Радев.
Таа изрази желење за денешната несреќа и загинувањето на двајца бугарски пилоти и искажа разбирање што поради тоа Радев вечерва не може да се придружи на изведбата на операта „Набуко“ на Македонската опера и балет во Софија.
Радев по средбата не даде изјава. Претходно, денеска и тој изрази надеж кажа дека конечно ќе се решат отворените прашања меѓу двете земји.
„Бугарија отсекогаш била отворена за дијалог со Република Северна Македонија и очекува овој дијалог да придонесе кон нашето културно зближување, но и да ја поттикне економската соработка. Очекуваме Северна Македонија да ги исполни сите свои обврски и кон нас и кон Европската Унија“, изјави Радев.
Според Радев, Владата во Скопје сè уште ја нема напуштено изборната реторика.
„Потребно е да се вратиме во реалноста, Нашите односи ќе зависат од склучените договори“, потенцираше Радев.
Ова е прва посета на Сиљановска Давкова откако ја презеде функцијата во мај годинава. Таа вечерва во Софија ќе присуствува на операта „Набуко“ од Џузепе Верди на Македонската опера и балет.
Во македонската делегација во Софија се и министерот за надворешни работи и надворешна трговија Тимчо Муцунски и министерот за култура и туризам Зоран Љутков.
